“Premtimi që u kthye në makth”, Ish-Ministri i Shëndetësisë: Në rrezik jo vetëm shëndetësia falas por…

Kjo krizë e madhe e sistemit tonë shëndetësorë kërkon para së gjithash zgjidhjen e sfidave profesionale, të burimeve njerëzore, të njerëzve që punojnë në sistemin tonë shëndetësor, vlerësoj sot Ish-Ministri i Shëndetësisë, Prof.Dr.Arben Beqiri në Konferencën “Sfida dhe vizione në shëndetësi” sepse shumë shpejtë, tha ai, jo vetëm që nuk do të ketë shëndetësi falas por nuk do të ketë as mjekësi shqiptare.

“Mendoj se me ritmet e largimit të personelit shëndetësor të mbi 800 mjekëve të larguar që nga viti 2013 deri më sot, situata alarmante që paraqitet kërkon vërtetë ndërhyrje drastike. Ne këtu së bashku, me të gjitha idetë që japim, nuk jemi për të përmirësuar sistemin, pasi mund të krijohet në një moment të caktuar kjo ide, për të rregulluar. Ne jemi në antagonizëm të plotë me këtë sistem, kjo është ajo që na vënë me të vërtetë përballë,” tha Profesor Arben Beqiri gjatë prezantimit të temës së tij “Shëndetësia falas, premtimi që u kthye në makth”, duke saktësuar se në rotacionin e pushtetit duhet ti kemi të qarta të gjitha hapat dhe mekanizmat që duhet të ndërmarrim për të ringjallur shpresën jo vetëm të personelit shëndetësorë.

“Shpresën e dy shtyllave mbi të cilën bazohet gjithë sistemi shëndetësor: ata që e marrin shërbimin, që janë pacientët tanë dhe ata që e japin shërbimin, që janë doktorët, infermierët dhe i gjithë personeli. Do të thosha se është e rëndësishme, imediate, rritja e pagave, do të ketë një impakt të jashtëzakonshëm për ndalimin e njerëzve,” tha kirurgu i njohur shqiptar duke sjellë një impresion nga prilli i vitit të kaluar, kur nga një tryezë e ngjashme, mesazhi që pati jehonën më të madhe ishte mesazhi i zotit Basha për rritjen e pagave.

Njerëzit kanë natyrën të harrojnë shpejtë, harrojnë çfarë themi për politikat, harrojnë çfarë themi për ligjet. Detyra jonë, tha profesor Beqiri, është që në premtimet tona të mos ketë gënjeshtra, që premtimet tona për rritjen e pagave të jenë të bazuara në një ekonomi të qartë, me financa të qarta dhe të mbrojmë premtimet tona. Dhe, të mos premtojmë gënjeshtra, mjekësi falas etj.

“Do ti thosha vetëm dy statistika të ditëve të fundit: sigurohem që nga Universitet i Shkodrës, Dega Infermieri, mbi 90 për qind e infermierëve hyjnë në vitin e parë me diplomë gjermanishte në xhep. Unë nuk mendoj më se ka nevojë të bësh pyetësor, ku dëshiron të jetosh, ku dëshiron të punosh, a dëshiron të qëndrosh, nuk ka nevojë për sondazhe për këtë. Po si është sistemi privat, se dikush mund të mendoj se shteti po vuan e privati është i lumtur. Informacioni nga një zinxhir spitalor privat me një numër mbi 3000 punonjësish, çdo muaj largohen 20 infermier e mjek, të gjithë  të kualifikuar, që kanë mësuar të punojnë në radiologji, laborator, salla të operacionit, do të thosha, kjo është e tmerrshme,” tha Ish-Ministri i Shëndetësisë duke shtuar se nga ana tjetër kemi Kryeministrin që në vitin 2019-2020 demonstron veglat e ndryshkura duke injoruar çdo gjë që është bërë përpara.

“Do të mjafton ti kujtoja që deri në ditën që ai flet, vetëm Unë, njëri prej kirurgëve, ka ba 11 mijë ndërhyrje me laparoskopi, që është një teknologji shumë e lartë, e futur në Shqipëri që në vitin 1995. Ta quajmë injorancë, do të thosha është pak, shumë pak. Injorancë, keqdashje ose abuzim me fonde publike është kur në vitin 2020 ti blejmë pajisjet për sallën më të mirë në Qendrën Spitalore që e trumbeton aq shumë triumf, të blejë pajisje 20 vjet të vjetra, një teknologji e cila është prezantuar në vitin 2000, pak më përpara në fakt; Teknologji të cilën qytetarët tonë pretendojnë ta kenë shumë herë më të mirë në shtëpitë e tyre. Kjo është e vërteta, këto janë problemet me të cilat ballafaqohemi ne sot.”

Në fund, mund të harrojmë shumë gjëra por disa gjëra duhet të na mbesin të qarta:

“Kujdesi ndaj pacientit, bazuar në Kushtetutën e Republikës së Shqipërisë, i garanton atij të drejtën për tu shërbyer edhe kur nuk ka, por nuk i monopolizon nga shteti të drejtën për të zgjedhë shërbimin, të drejtën për tu siguruar ku ai donë, të drejtën për të zgjedhur cilësinë e siguracionit që ai donë, alternativë të cilën partia demokratike e kishte gjatë qeverisjes së saj dhe që po e zhvillonte përkundër mangësive të skemës,” tha Ish-Ministri i Shëndetësisë, Prof.Dr.Arben Beqiri i alarmuar për situatën e rëndë në të cilën ndodhet shëndetësia duke përfunduar:

“Nëse nuk vazhdojmë ti zhvillojmë këto dy shtylla dhe burimet njerëzore si shtyllën e dytë, rritje të pagave me përmirësime të kushteve të punës, me specializime dhe kualifikime të vazhdueshme që të mund të ndihen të çmuar dhe të nevojshëm në vendin e tyre, Shqipërinë, mendoj që jo vetëm shëndetësi falas nuk do të ketë por nuk do të ketë as mjekësi shqiptare në kuptimin më të vërtetë të kësaj fjale.”  

Ndryshe, Konferenca “Sfida dhe vizione në shëndetësi” është organizuar nga Partia Demokratike dhe Fondacioni “Konrad Adenauer”.