Presidenca merr informacione lidhur me skandalin e spiunazhit

Ministria e Sigurisë në Bosnje Hercegovinë, i ka dorëzuar Presidencës, informacionet mbi aktivitetin e inteligjencës dhe diplomatëve kroatë në armatosjen e supozuar të islamistëve selafi në Bosnjë dhe Hercegovinë, raporton RFE.

“Duke pasur parasysh se ky është një informacion i lidhur me sigurinë, Ministria e Sigurisë në këtë moment, nuk mund të japë më shumë detaje mbi përmbajtjen e këtij dokumenti”, njoftoi Ministria e Sigurisë.

Drejtori i Agjencisë Kroate të Inteligjencës, Daniel Markiç, kohët e fundit e ka pranuar se oficerët e inteligjencës kroate kishin folur me qytetarët e Bosnjes pavarësisht faktit se në fillim autoritetet kroate kishin hedhur posht në tërësi pretendimet e ministrit Mektiç.

Bosnjë Hercegovina dhe Kroacia janë përfshirë tash e sa ditë në një aferë lidhur me pretendimet se Kroacia ka rekrutuar shtetas boshnjakë.

Kohë më parë prokuroria e Bosnjes tha se do të hetojë pretendimet e publikuara nga mediat se intelegjenca dhe diplomatët kroatë janë përpjekur të armatosin islamistët Selafi në Bosnjë.

Lidhur me këto pretendime, në prokurorin e Bosnjes, ka dhënë dëshminë e tij edhe ministri i Sigurisë, Dragan Mektiç.