Presidenti anulon datën e zgjedhjeve/ Reagimi, Edi Rama: Zgjedhjet do të mbahen më 30 Qershor!

Pas vendimit të Presidentit të Republikës për të shtyrë datën e zgjedhjeve, Kryeministri i zënë në befasi ndërsa po fliste para socialistëve të Beratit që nuk duan as bukë dhe as ujë vetëm Ilir Meta me ta të jetë bashkë, Edi Rama luajti të fortin duke deklaruar se mazhoranca më 30 qershor do bëjë zgjedhjet, pasi ato nuk janë të partive, as të Presidentit, por janë të popullit.

“Përsëri gabim, zgjedhjet do bëhen në 30 Qershor. Duan të pengojnë Reformën në Drejtësi. Në 30 qershor do të bëjmë zgjedhje, nuk janë as të partive, presidentit, por zgjedhjet janë të popullit shqiptar. E kuptoni se çfarë çorapi duan ta bëjnë Shqipërinë, gjetëm shesh dhe do bëjmë për shesh,” tha njeriu që tashmë e ka bërë çorapë këtë vend duke e quajtur madje një përpjekje e dëshpëruar, e disa njerëzve të dëshpëruar që janë të destinuar të humbin në mënyrë të dëshpëruar.

“Ata janë një tufë të mbaruarish që e kanë nxjerrë Shqipërinë rrugëve të botës duke e ushqyer me baltë Shqipërinë për të gjithë ata që duan të bëjnë sensasione. Ata e duan Shqipërinë pa drejtësi dhe që mbështetet fuqimisht nga partnerët tanë amerikanë dhe evropianë,” tha Edi Rama i përçudnuar në komunikim me rilindasit e tij duke u bërë Ballë dhe Taulant:

“Flasin për përgjime? Lulzim Basha që është nën hetim nga drejtësia amerikane dhe shqiptare. Apo Lulzim Basha bashkë me të atin e tij, plakun e marrë që i ka mbledhur që nga Lulzim Basha e Ilir Meta e me radhë si kokrrat e tespieve dhe i tund. Mbajani mend, zgjedhjet do mbahen në 30 qershor dhe ato tespijet e plakut do shpërbehen”.