Presidenti dhe Kryeministri izraelit: Tiranët terroristë iranianë qëlluan Spitalin! Irani: Baza ushtarake ishte në shënjestër!
Kryeministri izraelit Benjamin Netanyahu dhe presidenti Isaac Herzog kanë reaguar ashpër pasi një raketë iraniane goditi Spitalin Soroka në Beersheba, ndërkohë Irani e mohon duke theksuar se është qëlluar një bazë ushtarake ndërsa Spitali i është nënshtrua valës goditëse.
“Tiranët terroristë iranianë sot në mëngjes qëlluan me raketa Spitalin Soroka në Beersheba dhe popullsinë civile në qendër të vendit,” tha Netanyahu përmes rrjetit social X duke kërcënuar
“Tiranët në Teheran do të paguajnë çmimin e plotë”, shtoi kryeministri izraelit.
Ndërsa Presidenti izraelit Isaac Herzog, tha se objektivat e sulmeve iraniane përfshinë një të porsalindur në një inkubator, një nënë pranë shtratit, mjekët në turn dhe banorë të moshuar në shtëpi pleqsh.
“Për fat të mirë, ishte një mrekulli e vërtetë që askush nuk u vra në këtë sulm mizor iranian në spital”, tha Herzog, duke shtuar se ndër stafin dhe pacientët e këtij Spitali ka hebrenj dhe myslimanë.
“Në momente si kjo, le t’i kujtojmë vetes se çfarë është në të vërtetë në rrezik dhe çfarë vlerash mbrojmë,” tha Herzog në reagimin e tij.
Irani: Objektivi ishte një bazë ushtarake
Media shtetërore iraniane njoftoi se objektivi i sulmit me raketa, mëngjesin e sotëm, nuk ishte Spitali Soroka në Beersheba, por infrastruktura ushtarake e ushtrisë izraelite në afërsi të tij.
Sipas agjencisë IRNA, në shënjestër të sulmit ishin Qendra Komanduese-Inteligjente e Ushtrisë Izraelite, IDF C4i, dhe Kampi i Inteligjencës Ushtarake i vendosur brenda parkut teknologjik Gav-Yam Negev, pranë Spitalit dhe kampusit të Universitetit Ben Gurion.
“Infrastruktura ushtarake ishte një objektiv i drejtpërdrejtë dhe i saktë dhe Spitali iu nënshtrua valës së goditjes,” thuhet në Raport.
Massive damage to Soroka Medical Center in Beersheba, following the impact of a ballistic missile fired by Iran. pic.twitter.com/8rXhGeuk0z
— OSINTdefender (@sentdefender) June 19, 2025
Spitali u godit nga një raketë balistike
Për banorët e Lindjes së Mesme kjo është një skenë lufte tashmë e parë në disa raste në Rripin e Gazës, me dallimin thelbësor se sot viktimë ishin si pacientët izraelitët ashtu dhe spitali i goditur, dhe e akuzat për sulmin i bënë Izraeli!
Sot, Ministria e Jashtme izraelite ka njoftuar se Spitali Soroka u godit nga një raketë balistike iraniane. Spitali ndodhet në qytetin Beersheba dhe ofron kujdes shëndetësor për anëtarët e të gjitha komuniteteve, hebrenj, myslimanë, të krishterë dhe beduinë arabë, njoftoi ministria.
Izraeli tha se do të vazhdojë të veprojë për të “mbrojtur të gjithë njerëzit e tij, nga të gjitha sferat e jetës”.
Sulmi në spital është pjesë e një sulmi më të gjerë raketor iranian në territorin izraelit, si pjesë e përshkallëzimit të konfliktit mes dy vendeve. Sipas informacioneve të disponueshme, një pjesë e popullsisë civile ndodhej në zonën e spitalit në momentin e sulmit. Dhjetra njerëz u plagosën në sulm.
