Presidenti i Çekisë: Po më përgjon shërbimi im sekret!

Presidenti i Çekisë, Milosh Zeman, ka akuzuar shërbimin sekret çek se është duke e përgjuar atë dhe njerëzit përreth tij. 

“Kur flas me këta të punësuar me telefon, më përgjojnë dhe mua,” tha sot Zeman për gazetën Blesk duke shtuar se Kryeministri Andrej Babish i ka premtuar se mbikqyrja dhe përgjimi do të pushojnë, por kjo vazhdon. Këtë informacion, tha ai, e ka marrë nga burime nga shërbimi sekret çek, BIS.

Ndërkohë bëhet e ditur se për përgjimin e telefonit, BIS-it i duhet miratimi nga gjykata.

Zëdhënësi i shërbimit sekret çek, BIS, tha se nuk dëshiron ti komentoj deklaratat e presidentit.

Por revista Respekt shkruan se njëri prej këshilltarëve të Zemanit kishte kontakte në Rusi. Gjatë një udhëtimi në Moskë ai është takuar me përfaqësues të korporatës shtetërore bërthamore ruse Rosat.

Ndryshe, marrëdhëniet në mes të qeverisë çeke dhe asaj të Rusisë janë të tensionuara. Praga akuzon agjentët rus për shpërthimet në depon çeke të armëve në vitin 2014, ku mbetën të vdekur dy persona.

Milosh Zeman njihet me orientim prorus, madje në muajin prill mijëra çek kanë protestuar pasi Presidenti i Çekisë me rastin e këtij skandali u pozicionua në anën ruse. 

Kremlini i ka quajtur akuzat të pavërteta ndërkohë të dyja qeveritë i kanë dëbuar diplomatët për shkak të këtij skandali.