Presidenti i Këshillit Evropian sot në Kosovë, takim me Presidenten dhe Kryeministrin

Presidenti i Këshillit Evropian, António Costa, pritet të arrijë sot në Kosovës në kuadër të një vizite zyrtare në Ballkan.

Vizita e tij në Prishtinë vjen një ditë pas qëndrimit të tij në Beograd dhe në një kohë kur dialogu ndërmjet Kosovës dhe Serbisë mbetet në fokus të agjendës evropiane për Ballkanin Perëndimor.

Costa do të arrijë në Aeroportin Ndërkombëtar të Prishtinës gjatë pasdites, për të vijuar më pas me takime të nivelit të lartë institucional. Në orën 16:30, ai do të pritet nga Presidentja e Kosovës, Vjosa Osmani, në Zyrën e Presidencës. Pas takimit, është paraparë të mbahet një konferencë e përbashkët për media.

Ndërkohë, në orën 18:40, Costa do të zhvillojë takim me kryeministrin në detyrë të Kosovës, Albin Kurti, në ambientet e Zyrës së Kryeministrit.

Vizita e tij në Kosovë pason deklaratat e bëra një ditë më parë në Beograd, ku theksoi se “dialogu me Kosovën mbetet një nga kushtet kyçe për përparimin e Serbisë në procesin e integrimit evropian”.