Presidenti i Kroacisë: A është i vetëdijshëm Vuçiç se sa serbë janë veshur në të zeza nga deklarata e tij në vitin 1995 në Glinë?!

Presidenti i Kroacisë, Zoran Milanoviç, tha sot në Glinë se presidenti i Serbisë, Aleksandar Vuçiç, gjatë viteve 1990 ka manipuluar serbët duke ju krijuar iluzionin se Kroacia nuk është shtëpia e tyre, por pjesë e “Serbisë së madhe”.

“Gjithmonë më ka interesuar pse Vuçiç, edhe pse i vetëdijshëm se serbët ishin në pozitë të vështirë, kishte nevojë për të mashtruar popullin pikërisht në këtë mënyrë. Sado që Vuçiç do që kjo të harrohet sepse nuk është e këndshme, kjo nuk është e mundur,” tha Zoran Milanoviç në 30 vjetorin e themelimit të Regjimentit të 20-të të Gardës në Glinë.

Ai tha se kjo është arsyeja pse e pyeti Vuçiçin:

“A është i vetëdijshëm se sa serbë u veshën në të zeza për shkak të deklaratës që bëri në pranverën e vitit 1995 në Glinë?” tha Milanoviç duke shtuar:

“Nuk e pyeta për kroatët, sepse ai nuk çan kokën për kroatët!”

Kështu duke fol për rolin e Serbisë në luftë dhe keqkuptimeve që politikanët serbë, ndër të cilët veçoi Aleksandar Vuçiçin dhe Vojislav Sheshelin, ua imponuan serbëve në Kroaci gjatë viteve të 90-ta.

Ndryshe, në vitin 1995, në Glinë, si zyrtar i Partisë Radikale Serbe, Aleksandar Vuçiç e mbajti një fjalim të zjarrtë në të cilin serbëve lokal u tha se Banija dhe Glina kurrë nuk do të jenë kroate ndërsa i siguroi të pranishmit se do të jetojnë në “Serbinë e Madhe”, nëse radikalët fitojnë.