Presidenti Këshillit Evropian: Trajtimi i shqiptarëve në Luginë, rol të rëndësishëm në anëtarësimin e Serbisë në BE

Bashkimi Evropian po e ndjek me kujdes trajtimin e shqiptarëve në Luginën e Preshevës dhe pret nga Serbia që të jetë në përputhje me standardet ndërkombëtare dhe evropiane, tha Presidenti i Këshillit Evropian, Antonio Costa, duke siguruar se kjo do të ketë rol të rëndësishëm në anëtarësimin e Serbisë në BE.

“BE po ndjek me kujdes trajtimin e pakicave kombëtare, përfshirë edhe komunitetin shqiptar në Serbi.

Pakicat do të luajnë rol të rëndësishëm në kuadër të angazhimeve të Serbisë në procesin e anëtarësimit në BE. Nga Serbia pritet të përafrojë kuadrin e saj ligjor për të drejtat e pakicave me standardet ndërkombëtare dhe evropiane,” shprehet Presidenti i Këshillit Evropian, Antonio Costa, në përgjigje të letrës së deputetit shqiptar në Parlamentin e Serbisë, Shaip Kamberi, citon vetë përgjigjen deputeti Kamberi në rrjetin social Facebook.

“Këshilli Evropian është i njoftuar hollsishëm me çështjen e pasivizimit të adresave. Kjo çështje është trajtuar edhe në raportet e zgjerimit të BE-së,” shprehet Antonio Costa duke siguruar se BE do të vazhdojë t’i nxisë autoritetet serbe që të ofrojnë sqarime të qarta për publikun mbi mënyrën se si kryehen kontrollet për statusin e vendbanimit ndërsa përfundon:

“Angazhimi i jonë për avancimin e pozitës së pakicave do të vazhdojë – BE dhe integrimi i rajonit në të, mbeten aspiratat tona të vetme politike!”

Ndryshe, më 25 shkurt, deputeti shqiptar në Parlamentin e Serbisë, Shaip Kamberi, i është drejtuar përmes një letre Presidentit të Këshillit Evropian, Antonio Costa, duke e informuar lidhur me fushatën e Serbisë për pasivizimin e adresave të shqiptarëve në Luginën e Preshevës ndërsa i kërkon që Serbia të kushtëzohet me respektimin e të drejtave të shqiptarëve në Luginë.