Presidenti: Mehdi Bushati “Kalorës i Flamurit”! Të përndjekurit: Xhelat i Sigurimit të Shtetit!

Pas dekorimit të Mehdi Bushatit nga Presidenti i Republikës, Ilir Meta, me Titullin e lartë “Kalorës i Urdhrit të Flamurit” ka reaguar Shoqata Antikomuniste e të Përndjekurve Politikë të Shqipërisë duke i kujtuar Presidentit se kemi të bëjmë me njërin prej xhelatëve më famëkeq të Sigurimit të Shtetit.

“Me indinjatë të thellë morëm vesh dekorimin nga Ju me titullin e lartë “Kalorës i Flamurit “të një prej xhelatëve më famëkeq të Sigurimit të Shtetit, Mehdi Bushati. Personi që ju keni dekoruar është autor i shumë krimeve të komunizmit, arrestimeve, torturimeve e dënimeve të shumta politike gjatë diktaturës komuniste, dhe një nga drejtuesit e lartë të organizatës kriminale e terroriste, Sigurimi i Shtetit,” thuhet në protestën e Shoqatës Antikomuniste të Përndjekurve Politikë të Shqipërisë firmosur nga Kryetari Nebil Çika ndërsa i kujtojnë Presidentit të Republikës i cili në vijimësi abuzon me Kushtetutën dhe proklamohet si gardian i saj se krimet e Mehdi Bushatit në ligjin shqiptar dhe atë ndërkombëtar klasifikohen si “krime kundër njerëzimit dhe gjenocid“ dhe nuk parashkruhen.

Në letrën e protestës drejtuar Presidentit të Republikës, Ilir Meta, Shoqata Antikomuniste e të Përndjekurve Politikë të Shqipërisë deklaron se ka qindra prova, dokumente zyrtare e dëshmi publike të viktimave që provojnë autorësinë e krimeve të Mehdi Bushatit.

Ndryshe, Presidenti i Republikës, Ilir Meta vlerësoi me Titullin e lartë “Kalorës i Urdhrit të Flamurit” Mehdi Bushatin, me motivacionin: “Në shenjë vlerësimi për kontributin dhe personalitetin e tij të gjithanshëm në sport dhe në jetë.”

Shoqata Antikomuniste e të Përndjekurve Politikë të Shqipërisë

Tiranë më 31 .03. 2021

Protestë

Drejtuar: Presidentit të Republikës z. Ilir Meta

Z. President!

Me indinjatë të thellë morëm vesh dekorimin nga Ju me titullin e lartë “Kalorës i Flamurit “të një prej xhelatëve më famëkeq të Sigurimit të Shtetit, Mehdi Bushati.

Personi që ju keni dekoruar është autor i shumë krimeve të komunizmit, arrestimeve, torturimeve e dënimeve të shumta politike gjatë diktaturës komuniste, dhe një nga drejtuesit e lartë të organizatës kriminale e terroriste, Sigurimi i Shtetit. Krimet e tij në ligjin shqiptar dhe atë ndërkombëtar klasifikohen si “krime kundër njerëzimit dhe gjenocid“ dhe nuk parashkruhen. Ne kemi qindra prova, dokumente zyrtare e dëshmi publike të viktimave që provojnë autorësinë e krimeve të tij.

Vlerësojmë se ky veprim i juaji ( jo i vetmi ) është një fyerje publike e zyrtare nga ana e kreut të shtetit shqiptar ndaj viktimave të krimeve komunizmit dhe çdo qytetari tjetër të ndershëm të këtij vendi .

Akti Juaj është në shkelje të ligjit kushtetues, konventave ndërkombëtare parimeve të lirisë dhe demokracisë, vlerave të demokracisë perëndimore e moralit qytetar.

Nuk mund të pretendoni të jeni garant i Kushtetutës, lirisë dhe demokracisë kur me veprime të tilla nderoni e respektoni të kundërtën e këtyre. Gjëja më e keqe që i ka ndodhur ndonjë herë në histori kombit e popullit shqiptar. Dekorimi nga ana Juaj i hanxharëve të përgjakur të diktaturës komuniste është një akt i pa pranueshëm nga ana jonë dhe prova që shteti shqiptar dhe ju personalisht nuk jeni shkëputur nga diktatura komuniste e as nuk e keni vullnetin politik për ta bërë këtë.

Dua t’iu kujtoj ato që iu thash sy për sy në fjalën time gjatë ceremonisë së dekorimit të dy të mbijetuarave të kampit komunist të shfarosjes në Tepelenë, në 23 Gusht 2018: ”…Z, President është këtu edhe për të dekoruar disa të mbijetuar të Kampit të Tepelenës dhe shumë mirë po bën. Por ka ndodhur në të shkuarën, shpresoj të mos ndodh më, që institucionet shtetërore, Presidenti, qeveria etj. sa herë që dekorojnë njerëzit tanë, viktimat e krimeve të komunizmit, shkojnë në Tirane dhe dekorojnë edhe autorët e këtyre krimeve. Sot Enver Hoxha dhe gjithë banda e tij kriminale janë heronj dhe tituj të tjerë, të dhëna nga shteti shqiptar. Shpresoj që kjo të mos përsëritet më….ndajeni mendjen, o me viktimat o me xhelatët… “.

Me këtë dekorim por edhe të tjerë me parë duket që Ju e keni marrë vendimin tuaj për të qenë me xhelatët.

Z. President !

Dy javë më parë kam kërkuar nga Ju të dekoroni një nga legjendat e gjalla të qëndresës sonë antikomuniste, ish të burgosurin politik Qani Sadiku, nënkryetar i Këshillit Kombëtar të Shoqatës Antikomuniste të Përndjekurve Politik të Shqipërisë. Pas dekretit tuaj për të dekoruar një xhelat nga më famëkeqit të “ Sigurimit të Shtetit“ e tërheq përfundimisht kërkesën time për dekorimin e Z.Sadiku .

Nuk mundet ti jepni të njëjtën dekoratë edhe xhelatëve edhe viktimave e martirëve, kjo është më shume se hipokrizi. Për ne është një krim i komunizmit, më shumë.

Sa të jem unë Kryetar i të përndjekurve politikë antikomunistë dhe ju President i Republikës, kjo nuk do të ndodhë më në asnjë rast e rrethanë.

Kryetari

Nebil Çika