Presidenti Thaçi kërkon unitet ndërkombëtar për Kosovën
Presidenti i Kosovës, Hashim Thaçi, në takim me ambasadorët dhe shefat e zyrave dhe misioneve ndërkombëtare në Kosovë, u shpreh sot se e ka mirëpritur kthimin e vëmendjes së Gjermanisë dhe Francës në çështjet e Ballkanit Perëndimor, në veçanti në procesin e dialogut në mes të Kosovës dhe Serbisë.
“Vlerësoj lart vullnetin e mirë të kancelares Merkel dhe këmbëngulësinë e presidentit Macron që çështjet e Ballkanit Perëndimor të lëvizin përpara”, u shpreh presidenti Thaçi duke folur për takimin e Berlinit, ndërsa theksoi se takimi i Berlinit as nuk mbylli dhe as nuk hapi ndonjë ide apo koncept për mundësinë e arritjes së marrëveshjes përfundimtare Kosovë-Serbi.
Thaçi mirëpriti edhe kërkesën që të vazhdojë dialogu në mes të Kosovës dhe Serbisë, në kërkim të një marrëveshjeje paqësore, që për Kosovën duhet të jetë marrëveshje përfundimtare, ligjërisht obliguese, që sjellë njohje reciproke dhe anëtarësim në Kombet e Bashkuara.
“Marrëveshje me të cilën ruhet substanca dhe karakteri shumetnik i vendit dhe shoqërisë, si dhe që hap rrugë integrimit në NATO dhe në BE”, u shpreh Hashim Thaçi duke theksuar rëndësinë që shtetet perëndimore të jenë më unike dhe më të qarta në këtë proces, në veçanti 5 shtetet e Kuintit, SHBA-ja, Britania e Madhe, Gjermania, Franca dhe Italia.
“Përvoja e së kaluarës së afërt tregon se kur ka funksionuar ky unitet edhe skena politike në Kosovë ka qenë unike dhe e gatshme për të lëvizur përpara,” u shpreh presidenti Thaçi para ambasadorëve dhe shefave të misioneve, duke pohuar se ishte i befasuar kur ka mësuar që për takimin e Berlinit nuk kishte koordinim me Shtetet e Bashkuara.
Si të arritura të takimit të Berlinit, presidenti Thaçi e vlerësoi të suksesshëm dakordimin e Kosovës dhe Serbisë që, pas insistimit të presidentit Macron, të mbahet takimi i ardhshëm në Paris, më 1 korrik:
“Shpresoj se takimi në Paris do të jetë më mirë i përgatitur, se vendet anëtare të BE-së do të jenë më unike, do të prezantojnë ide kreative si të lëvizet përpara dhe takimi do të ketë substancë.”
Duke folur për pjesëmarrjen e Kosovës në takimin e ftuar për 1 korrik në Paris, ai tha se Kosova në këtë takim do të jetë unike dhe do të përfaqësohet nga liderët e institucioneve, nga Delegacioni Shtetëror për Dialogun dhe se platformë e delegacionit kosovar në këtë takim do të jetë rezoluta e Parlamentit të Kosovës.
Në fund të takimit me ambasadorët dhe shefat e misioneve ndërkombëtare në Kosovë, Presidenti i Kosovës, Hashim Thaçi,
tha se nuk do të lejojmë që dialogu të kushtëzohet nga Serbia, duke shtuar se taksa kundër prodhimeve të Serbisë do të mbetet në fuqi.
