Presidenti Trump bën thirrje për luftë kundër kartelave të drogës në Meksikë

Presidenti i Shteteve të Bashkuara, Donald Trump, i bëri thirrje Meksikës që, me ndihmën e SHBA-së, t’i luftojë kartelat e drogës, që besohet se kanë zënë në pritë një grup amerikanësh mormonë në veri të Meksikës, duke vrarë nëntë gra dhe fëmijë.

“Nëse Meksika kërkon apo i duhet ndihmë për pastrimin e këtyre monstrave, Shtetet e Bashkuara janë të gatshme dhe janë në gjendje për t’u përfshirë dhe për ta bërë punën shpejt dhe në mënyrë efektive”, tha Presidenti Trump përmes një postim në Twitter.

Ndryshe, prita ka ndodhur dje në Ranço de la Mora, një zonë famëkeqe për trafikantët e drogës, raporton RFE.

Julian Lebaron tha për mediat në Meksikë se kushërira e tij ka qenë duke udhëtuar me katër fëmijët e saj, kur makina e tyre është sulmuar dhe vënë në zjarr me viktimat brenda. Dy makina të tjera u gjetën po ashtu me trupat e pajetë të dy grave, të një djali dhe të një vajze.

Presidenti Trump tha se presidenti i Meksikës, Andres Manuel Lopez Obrador, e ka bërë luftimin e karteleve të drogës një çështje të madhe, por shtoi se “kartelat janë bërë aq të mëdha dhe të fuqishme sa që ndonjëherë ju duhet një ushtri për të mposhtur një ushtri”.