Presidenti Trump: Deri në 70.000 amerikanë mund të vdesin nga koronavirusi

Presidenti i Shteteve të Bashkuara, Donald Trump, tha se koronavirusi në SHBA mund të vrasë deri në 70.000 njerëz, por theksoi se parashikimet fillestare ishin shumë më të larta.

Duke folur për gazetarët në Shtëpinë e Bardhë, Presidenti Trump tha se fillimisht është parashikuar se 2.2 milionë amerikanë mund të vdesin nga koronavirusi dhe se tani, kjo shifër ka rënë në 60 ose 70 mijë.

“Edhe kjo është shumë, edhe një person është shumë, por mendoj se kemi marrë shumë vendime të mira”, tha Presidenti Trump.

“Vendim i madh ka qenë mbyllja e kufirit me Kinën”, shtoi ai.

Shumica e shteteve amerikane, raporton RFE, kanë lëshuar urdhrin e qëndrimit në shtëpi, si masë për frenimin e koronavirusit. SHBA ka aktualisht numrin më të madh të të infektuarve dhe viktimave: mbi 988 mijë, përkatësisht mbi 56 mijë.

I pyetur nga gazetarët nëse një president amerikan e meriton të rizgjidhet, kur më shumë amerikanë kanë humbur jetën në gjashtë javë, se sa në Luftën e Vietnamit, Presidenti Trump tha se edhe vdekja e një personi është shumë.