Presidenti Trump: Është koha për paqe dhe qetësi

Presidenti i SHBA, Donald Trump, sot bëri thirrje për paqe dhe qetësi në Shtetet e Bashkuara, pasi mohoi përgjegjësinë për sulmin ndaj Kongresit nga ana e mbështetësve të tij, javën e kaluar.

“Tani është koha që kombi ynë të shërohet dhe është koha për paqe dhe për qetësi,” tha Presidenti Trump gjatë një vizite në Alamo të Teksasit.

Presidenti Trump i bëri komentet pak para se Dhoma e Përfaqësuesve të votojë për një rezolutë të sponsorizuar nga demokratët, e cila i bën thirrje nënpresidentit, Mike Pence, të zbatojë amendamentin e 25-të dhe të heqë Donald Trumpin nga detyra për rolin e tij në dhunën që ndodhi më 6 janar.

“Amandamenti i 25-të është me rrezik zero për mua,” tha Presidenti Trump, ndërsa fliste para një pjese të murit kufitar të Meksikës në Teksas, një simbol i politikës së ashpër të imigracionit që ai ka ndjekur gjatë mandatit të tij.

Para nisjes në Teksas, presidenti amerikan i quajti përgatitjet e Kongresit për të filluar procesin e shkarkimit ndaj tij, si absolutisht qesharake dhe tha se ato po shkaktonin një zemërim të jashtëzakonshëm.

Përpjekjen për shkarkim të Dhomës së Përfaqësuesve, Presidenti Trump e quajti një vazhdim i gjuetisë më të madhe të shtrigave në historinë e politikës.

Dhoma e Përfaqësuesve në Shtetet e Bashkuara prezantoi dje një rezolutë për gjykimin e presidentit Donald Trump, nën akuzat për “nxitje të kryengritjes”.

Demokratët që udhëheqin këtë dhomë të Kongresit amerikan, e fajësojnë Presidenti Trump për nxitje të trazirave, javën e kaluar, në Kongres. Sipas tyre, pesë vetë kanë mbetur të vdekur, pasi mbështetësit e Donald Trump kanë sulmuar dhunshëm ndërtesën e Kongresit dhe janë përplasur me policinë.

Duke komentuar këto zhvillime, Presidenti Trump tha se “ne nuk duam asnjë dhunë”.

Procedura për shkarkimin e presidentit që në anglisht njihet si “impeachment” do të thotë të ngresh akuza në Kongres, që do të përbëjnë bazën për gjykim.

Kushtetuta e Shteteve të Bashkuara thotë se një president largohet nga detyra për “tradhti, ryshfet, shkelje të rëndë ose kundërvajtje të tjera”.

Procedura për shkarkim zhvillohet në dy faza. Nis me seanca dëgjimore në Dhomën e Përfaqësuesve dhe, nëse miratohet me shumicë të thjeshtë, procesi kalon në Senat, ku edhe mbahet gjykimi.

Në Senat, pastaj, duhen dy të tretat e votave për largimin e presidentit nga detyra dhe një gjë e tillë nuk është arritur kurrë në historinë e Shteteve të Bashkuara.

Në vitin 2019, Presidenti Trump është përballur edhe me një proces të impeachmentit. Senati, megjithatë, ka votuar kundër shkarkimit të presidentit./RFE/