Presidenti Trump firmos paketën e ndihmës prej gati 500 miliardë dollarësh

Presidenti i Shteteve të Bashkuara, Donald Trump, firmosi një paketë të ndihmës, në vlerë prej gati 500 miliardë dollarësh, për rimëkëmbjen e ekonomisë së goditur nga pandemia e koronavirusit.

Paketa është edhe një përpjekje e Qeverisë amerikane për të ndihmuar bizneset që është dashur të mbyllen, për të frenuar përhapjen e sëmundjes.

Gjatë pesë javëve të fundit, raporton RFE, afro 26 milionë njerëz kanë mbetur pa punë në SHBA.

Presidenti Trump falënderoi Kongresin që, siç tha, i është përgjigjur thirrjes së tij për ndihmë.

“Fitore e jashtëzakonshme”, tha Presdenti Donald Trump duke shtuar:

“Shumë mirë për bizneset e vogla, shumë mirë për punëtorët!”

Shtetet e Bashkuara janë vendi më i prekur në botë nga koronavirusi. Të premten, numri i viktimave atje ka kaluar 50,000, ndërsa i të infektuarve është mbi 880.000.

Ndryshe, në gjithë botën, mbi 2.7 milionë njerëz janë infektuar dhe mbi 194.000 kanë vdekur.