Presidenti Trump i ndan medalje Grenellit për marrëveshjen Kosovë-Serbi
Presidenti i Shteteve të Bashkuara, Donald Trump, e ka dekoruar Të Dërguarin e tij të Posaçëm për dialogun Kosovë-Serbi, Richard Grenell me Medaljen e Sigurisë Kombetare.
“Ambasadori Richard Grenell është nderuar për kontributin e tij të jashtëzakonshëm që mundësoi nënshkrimin historik të normalizimit të marrëdhënieve ekonomike midis Serbisë dhe Kosovës. Sipas kësaj marrëveshje, Serbia dhe Kosova rivendosën lidhjet e drejtpërdrejta ajrore, hekurudhore dhe autostradën, projektet kryesore të infrastrukturës të nevojshme për të lehtësuar rritjen ekonomike dhe transferimin në kohë të mallrave dhe njerëzve,” tha Presidenti Trump në vendimin e tij.
Njoftimin e ka bërë vetë ambasadori Grenell përmes një postimi në rrjetin social Instagram.
“Kjo marrëveshje është një hap i rëndësishëm drejt ndërtimit të një Evrope më paqësore, të sigurt dhe më të prosperuar. Kontributet e Ambasadorit Grenell në arritjen e këtij përparimi historik diplomatik në Serbi dhe Kosovë do të çojnë në një të ardhme më të ndritur për miliona njerëz,” thuhet në vendim.
Ndryshe, raporton RFE, Richard Grenell u emërua I dërguar i Posaçëm i Presidentit të SHBA, Donald Trump, për dialogun Kosovë-Serbi, në tetor të vitit 2019, derisa po shërbente si Ambasador i Shteteve të Bashkuara në Gjermani.
Kosova dhe Serbia kanë nënshkruar më 4 shtator, në Uashington, dy dokumente për normalizimin e raporteve ekonomike, në prani të presidentit të Shteteve të Bashkuara, Donald Trump.
