Presidenti Trump kërcënon me bllokimin e qeverisë nëse nuk miratohet plani i tij për emigrantët

Presidenti i SHBA, Donald Trump tha sot se do të lejoj bllokimin e punës së qeverisë federale nëse demokratët refuzojnë të mbështesin ndryshimet e mëdha të Ligjit mbi emigracionin për të cilën angazhohet administrata e tij.

“Do ta bllokoj punën e qeverisë nëse demokratët nuk na japin votat për sigurinë e kufijve, ku përfshihet edhe muri! Duhet të heqim dorë nga llotaria… dhe përfundimisht të kalojmë në sistem emigracioni me merita! Në vendin tonë duhet të vijnë njerëz të shkëlqyeshëm,” shkruan Presidenti Trump në rrjetin social Twitter.

Presidenti Trump dëshiron që Kongresi të miratoj ligjin me të cilin do të zgjidhej çështja e emigracionit. Edhe pse republikanët kontrollojnë Kongresin, mospajtimet me konservatorët në parti pengojnë miratimin e ligjit. Propozimi i ligjit për emigracionin të cilin e mbështesin konservatorët republikanë nuk ka kaluar javën e kaluar në Dhomën e përfaqësuesve të Kongresit amerikan.

Ndryshe, Presidenti Trump ka kërkuar 25 miliardë dollarëpër ndërtimin e murit përgjatë kufirit amerikan me Meksikon.