Presidenti Trump letër Kryeministrit Norvegjisë: S’ka Nobel? S’ndihem më i detyruar të mendoj për paqen!

Presidenti i SHBA-së, Donald Trump, i ka dërguar një letër kryeministrit norvegjez Jonas Gahr Støre, ku sipas të gjitha mediave kryesore norvegjeze, e informon se nuk ndihet i detyruar të punojë ekskluzivisht për paqen, duke pasur parasysh se vendi i tij ka vendosur të mos ia japë Çmimin Nobel për Paqen.

“I dashur Jonas, Duke pasur parasysh se vendi juaj ka vendosur të mos më japë Çmimin Nobel për Paqen, edhe pse kam ndaluar të paktën tetë luftëra, nuk ndihem më i detyruar të mendoj ekskluzivisht për paqen, megjithëse paqja do të mbizotërojë gjithmonë, por tani mund të mendoj për atë që është e mirë dhe e drejtë për Shtetet e Bashkuara.

Danimarka nuk mund ta mbrojë Groenlandën nga Rusia apo Kina. Pse duhet të ketë ‘të drejta pronësie’ fare?” thuhet në letrën e Presidentit Trump duke përfunduar:
“Nuk ka të dhëna të shkruara; vetëm një anije u ankorua atje qindra vjet më parë, por edhe ne kemi ankoruar anije atje. Unë kam bërë më shumë për NATO-n se çdo person tjetër që nga themelimi i saj, dhe tani NATO duhet të bëjë diçka për Shtetet e Bashkuara. Bota nuk është e sigurt nëse nuk kemi kontroll të plotë të Groenlandës. Faleminderit! President DJT.”

Reagimi në Norvegji
E përditshmja norvegjeze Verdens Gang raporton reagimin e kryeministrit norvegjez Støre ku konfirmohet kjo letër:

“Mund të konfirmoj se ky është mesazhi që mora të dielën pasdite nga Presidenti Trump. Ai erdhi si përgjigje e një mesazhi të shkurtër drejtuar presidentit që i dërgova më herët atë ditë në emër tim dhe të Presidentit të Finlandës, Alexander Stubb.”

Mesazhi i Trump, i cili arriti edhe te disa ambasadorë evropianë në Washington, u raportua për herë të parë nga gazetari i PBS, Nick Schifrin. Mesazhi shkaktoi reagime në Norvegj ndërkohë mediat vazhdimisht theksojnë se qeveria norvegjeze nuk ka të bëjë fare me Çmimin Nobel.

NEW: @potus letter to @jonasgahrstore links @NobelPrize to Greenland, reiterates threats, and is forwarded by the NSC staff to multiple European ambassadors in Washington. I obtained the text from multiple officials:

Dear Ambassador:

President Trump has asked that the…

— Nick Schifrin (@nickschifrin) January 19, 2026

Fituesi nuk mund ta ndajë çmimin
Me sa duket, Presidenti Trump nuk e harron dot vendimin e Komitetit të Nobelit në dhjetor për t’ia dhënë Çmimin e Paqes 2025 politikanes opozitare venezueliane María Corina Machado, edhe pse ajo personalisht ia dorëzoi Medaljen e Artë Nobel në Washington disa ditë më parë.

Ndërkohë, Komiteti i Nobelit ka përsëritur se “laureati origjinal mbetet në histori si marrësi i çmimit, edhe nëse medalja ose diploma më vonë bie në zotërim të dikujt tjetër”. Fituesi nuk mund ta ndajë çmimin me të tjerët, as nuk mund të transferohet pasi të jetë dhënë. Çmimi Nobel për Paqen gjithashtu nuk mund të revokohet kurrë.

“Në mesazhin drejtuar Trump, ne përcollëm qëndrimin tonë kundër tarifave të tij që synojnë Norvegjinë, Finlandën dhe vende të tjera. Ne theksuam nevojën për një deeskalim të shkëmbimit të fjalëve dhe kërkuam një bisedë telefonike midis Trump, Stubb dhe meje gjatë ditës. Përgjigja e Trump erdhi menjëherë pasi dërguam mesazhin. Zgjedhja e Trump ishte ta ndante mesazhin me udhëheqës të tjerë në vendet e NATO-s”, tha Kryeministri i Norvegjisë për Verdens Gang:

“Pozicioni i Norvegjisë për Groenlandën është i qartë. Groenlanda është pjesë e Mbretërisë së Danimarkës dhe Norvegjia e mbështet plotësisht atë në këtë çështje. Ne gjithashtu mbështesim forcimin e përgjegjshëm të punës së NATO-s për sigurinë dhe stabilitetin në Arktik,” tha Kryeministri i Norvegjisë, Jonas Gahr Støre, për të përditshmen norvegjeze, Verdens Gang, duke për përfunduar:

“Lidhur me Çmimin Nobel për Paqen, ia kam bërë të qartë vazhdimisht Trump atë që dihet mirë, se çmimi jepet nga një Komitet i Pavarur i Nobelit, jo nga qeveria norvegjeze”, përfundoi ai.