Presidenti Trump: Lufta, fundi zyrtar i Iranit!
Presidenti amerikan, Donald Trump ka nisur një paralajmërim të ashpër ndaj Iranit, duke thënë se ky shtet do të shkatërrohet nëse përshkallëzohen edhe më shumë mospajtimet në mes të të dyja shteteve, raporton RFE.
“Nëse Irani dëshiron të luftojë, atëherë ai do të jetë fundi zyrtar i Iranit,” tha Presidenti Trump përmes një postimi në Twitter.
“Mos i kërcënoni më kurrë Shtetet e Bashkuara!”
Së fundmi SHBA ka pozicionuar anije luftarake dhe aeroplanë në Gjirin Persik. Dhe kjo deklaratë e Presidentit Trump ishte ndryshe nga qëndrimet e tij së fundmi, në përpjekje për të anashkaluar konfliktin. Ai edhe me këshilltarëve të tij ishte shprehur se nuk dëshiron që presioni i SHBA-së ndaj Iranit të shndërrohet në konflikt.
Ndryshe, tensionet SHBA-Iran janë rritur majin e vitit të kaluar, kur Shtetet e Bashkuara janë larguar nga marrëveshja bërthamore që Teherani ka nënshkruar me fuqitë botërore. Sipas marrëveshjes, Irani është zotuar për frenim të aktivitetit bërthamor, në këmbim të lirimit nga sanksionet ndërkombëtare.
Kur ishte larguar nga kjo marrëveshje, Presidenti Trump u shpreh se kushtet e këtij dokumenti nuk kanë qenë mjaftueshëm të ashpra për të parandaluar Iranin në të krijuarit e armëve bërthamore, si dhe nuk ka përmendur mbështetjen e këtij shteti për grupet militante në rajon.
