Presidenti Trump mund të shtojë tarifa ndaj Kinës

Presidenti amerikan, Donald Trump tha sot se do të vendosë tarifa shtesë ndaj Kinës, nëse nuk arrihet marrëveshje për tregti me këtë shtet, raporton RFE.

“Unë do të shtoj tarifat, masa shtesë, nëse nuk arrihet një marrëveshje,” tha Presidenti Trump në një intervistë për rrjetin Fox.

Ai e ka lënë të hapur mundësinë e arritjes së ndonjë pajtueshmërie me presidentin kinez, Xi Jinping, në Samitin e 20 vendeve më të industrializuara, G20, që do të mbahet në Japoni gjatë kësaj fundjave.

Kina dhe Shtetet e Bashkuara janë përfshirë në tensione tregtare, pas vënies së tarifave nga të dyja palët, dhe dështimit të bisedimeve për arritje të ndonjë marrëveshjeje.

Presidenti Trump tha gjatë intervistës se Kina e di çfarë i duhet SHBA-së për të funksionuar marrëveshja.

Presidenti amerikan ka thënë se nëse Uashingtoni nuk është në gjendje të arrijë marrëveshje tregtare me Pekinin, plani i tij është është që të zvogëlojë biznesin me Kinën.

I pyetur rreth asaj se kompanitë janë duke zhvendosur prodhimin nga Kina në Vietnam, Presidenti Trump tha se Vietnami e ka trajtuar SHBA-në edhe më keq sesa Kina.