Presidenti Trump nominohet për Çmimin Nobel për Paqe
Presidenti i SHBA, Donald Trump, është nominuar për Çmimin Nobel për Paqe për vitin 2021, për merita në ndërmjetësimin dhe vendosjen e normalizimit të marrëdhënieve në mes të Izraelit dhe Emirateve të Bashkuara Arabe.
Presidentin amerikan e ka nominuar politikani norvegjez Christian Tybring-Gjedde, i cili është deputet i parlamentit në mandatin e tij të katërt, raporton Fox News.
“Për shkak të meritave të tij, mendoj se më shumë ka punuar në vendosjen e paqes në mes të popujve se sa shumica e kandidatëve që janë dominuar për këtë Çmim,” e arsyetoi vendimin e tij Tybring-Gjedde.
Ndryshe, dje zyrtari i Shtëpisë së Bardhë paralajmëroi se më 15 shtator, Presidenti Trump do të mbajë një ceremoni ku do të firmos Marrëveshjen e Lindjes së Mesme mbi normalizimin e marrëdhënieve në mes të Izraelit dhe Emirateve të Bashkuara Arabe.
Si pjesë e Marrëveshjes, që u paralajmërua në Shtëpinë e Bardhë më 13 Gusht, siç theksuan zyrtarët, pas bisedimeve 18 mujore, Emiratet e Bashkuara Arabe ranë dakord për normalizimin e marrëdhënieve me Izraelin ndërsa Izraeli është obliguar që të vazhdoj me planet për ndërprerjen e aneksimit të bregut Perëndimor.
Për vitin 2020, për Çmimin Nobel për Paqe janë kandiduar 318 personalitete.
Kandidimet duhet të dërgohen me postë elektronike ndërsa diskutohen të gjithë kandidatët, para se të hartohet një listë e ngushtë me kandidatët më cilësor dhe më të veçantë.
