Presidenti Trump paralajmëron masa tregtare ndaj BE-së

Presidenti i Shteteve të Bashkuara, Donald Trump, e ka orientuar vëmendjen e tij drejt një ristrukturimi të marrëdhënieve tregtare me Bashkimin Evropian.

Vlera e shkëmbimeve tregtare SHBA-BE vlerësohet të jetë në rreth 1 trilion dollar. Presidenti Trump, raporton RFE, prej kohësh është ankuar se qëndrimi i BE-së mbi tregtinë është “më i keq se Kina.

“Evropa na ka trajtuar shumë keq. Gjatë 10-12 viteve të fundit, ka pasur një deficit të jashtëzakonshëm me Evropën. Ata kanë pengesa që janë të jashtëzakonshme,” tha Presidenti i SHBA.

Zyrtarët evropianë thanë se janë të gatshëm të punojnë me Presidentin Trump për të adresuar këtë çështje. Por, ata paralajmërojnë se do të hakmerren kundër çdo lëvizje të SHBA për të vendosur tarifa për makinat dhe produktet e tjera, siç ka kërcënuar disa herë presidenti amerikan.

“Ne do t’i përgjigjemi tarifave të SHBA-së, dhe ne dimë t’i strukturojmë ato që të jenë efektive”, tha Norbert Roettgen, një ligjvënës i lartë konservator gjerman, pas takimeve me zyrtarë të Shtëpisë së Bardhë dhe Departamentit të Shtetit. Ndërkohë të premten, ambasadori i Shteteve të Bashkuara në BE, Gordon Sondland, u shkarkua nga ana e Presidentit Trump.

Shtetet e Bashkuara, importuesi më i madh në botë dhe blloku 27 anëtarësh i BE-së, po përballen me mosmarrëveshje që përfshijnë subvencionet e linjave ajrore, pengesat në tregtinë bujqësore dhe planet e BE-së për të taksuar kompanitë e mëdha digjitale amerikane.