Presidenti Trump prezanton Planin për Paqe në Lindjen e Mesme

Presidenti i Shteteve të Bashkuara, Donald Trump, pritet të shpalosë sot planin e tij për paqe në Lindjen e Mesme, edhe pse udhëheqësit palestinezë e kanë refuzuar atë.

Presidenti Trump tha dje gjatë një takimi me kryeministrin izraelit, Benjamin Netanyahu, në Washington, se plani i tij “ka shumë kuptim për secilin”, raporton RFE.

“Palestinezët me siguri se nuk do ta duan fillimisht. Por, në fund do ta duan. Është shumë i mirë për ta,” tha Presidenti Trump.

Kryeministri palestinez, Muhammad Shtayyeh, e cilësoi planin si “komplot për të likuiduar çështjen palestineze”.

Udhëheqësit palestinezë thonë se ata nuk janë ftuar në Washington për prezantimin e “projektit të fshehtë të paqes” të Presidentit Trump dhe druajnë se me këtë plan, SHBA do ta njohë Bregun Perëndimor, të cilin ata e duan për shtetin e tyre të ardhshëm, si pjesë të Izraelit.

Ndryshe, Bregu Perëndimor është pushtuar nga Izraeli në luftën arabo-izraelite në vitin 1967.