Presidenti Trump: SHBA tërhiqet nga traktati me Rusinë për armët bërthamore

Presidenti i Shteteve të Bashkuara, Donald Trump, tha se do të tërhiqet nga marrëveshja me Rusinë për kontroll të armëve që daton nga Lufta e Ftohtë.

“Ne do ta ndalim marrëveshjen dhe do të tërhiqemi”, tha Presidenti Trump para gazetarëve. “Rusia ka shkelur marrëveshjen për shumë vitë,” raporton RFE.

“Ne duhet të zhvillojmë ato armë, vetëm nëse Rusia dhe Kina vijnë tek ne dhe na thonë, le të bëhemi njëmend të mençur dhe asnjëri nga ne të mos zhvillojë armët”, tha Presidenti i SHBA, Donald Trump.

Ndryshe, traktati i vitit 1987 i ndalon Shteteve të Bashkuara dhe Rusisë, posedimin, prodhimin dhe transportin e armëve raketore. SHBA kishte akuzuar Rusinë nga viti 2014 për shkelje të marrëveshjes.

Rusia kishte kundërshtuar akuzat e SHBA-së duke theksuar se disa elemente të sistemit të armëve kanë qenë në kundërshtim me marrëveshjen.

Deklaratat e Presidentit Trump vijnë disa ditë pasi Vladimir Putini tha se Rusia mund të përdorë armët bërthamore në përgjigje ndaj ndonjë sulmi bërthamor në vend.