Presidenti Trump shkarkon Drejtorin e Shërbimit Sekret

Presidenti i Shteteve të Bashkuara, Donald Trump, shkarkoi Drejtorin e Shërbimit Sekret, Agjencisë që ofron mbrojtje për të dhe zyrtarë të tjerë të lartë të SHBA-së, raporton RFE.

Shtëpia e Bardhë konfirmoi shkarkimin e Randolph Alles, një ditë pasi Presidenti Trump njoftoi se Sekretarja për Sigurinë Kombëtare, Kirstjen Nielsen, po linte postin.

Zëdhënësja e Shtëpisë së Bardhë, Sarah Sanders, tha se James Murray, agjent i Shërbimit Sekret, do të marrë postin e Drejtorit në këtë Agjenci nga muaji maj.

Alles e ka udhëhequr Shërbimin Sekret për dy vjet dhe ka shërbyer në Trupat Detare të SHBA-së për 35 vjet, përpara se të tërhiqej nga ushtria në vitin 2011.

Shërbimi Sekret është përgjegjës për mbrojtjen e presidentit dhe të Zv/Presidentit të SHBA-së, të Ish-Presidentëve dhe krerëve të shteteve që vizitojnë SHBA-në.