Presidenti Trump shkarkon Drejtorin e Sigurisë Kibernetike

Presidenti i Shteteve të Bashkuara, Donald Trump, ka shkarkuar Drejtorin e Agjencisë së Sigurisë Kibernetike dhe të Sigurisë së Infrastrukturës, CISA, pasi deklaroi se zgjedhjet presidenciale të vitit 2020 ishin të sigurta.

Presidenti Trump njoftoi se ai kishte marrë vendim të pushojë nga puna, Christopher Krebs, duke theksuar se një deklaratë e fundit që Agjencia e Krebs bëri për të mbrojtur sigurinë e zgjedhjeve ishte shumë e pasaktë.

Krebs drejtoi Agjencinë e Sigurisë Kibernetike dhe të Sigurisë së Infrastrukturës, CISA, që nga krijimi i saj, pas ndërhyrjes ruse në zgjedhjet e 2016 deri në zgjedhjet e 3 nëntorit.

Si kreu i CISA-s, Krebs ishte një nga zyrtarët më të lartë që punonte për të siguruar infrastrukturën e votimit kundër ndërhyrjeve dhe mashtrimeve të huaja. Ai është lavdëruar për punën e tij nga ligjvënësit e të dyja partive, si dhe zyrtarë shtetërorë dhe zgjedhorë në të gjithë vendin.

Javën e kaluar, raporton RFE, Agjencia tha në një deklaratë se zgjedhjet e vitit 2020 ishin “më të sigurtat në historinë amerikane”.

Pas shkarkimit, Krebs shkroi në Twitter:

“I nderuar që kam shërbyer. Ne e bëmë punën si duhet. Mbro sot, siguro të nesërmen.”

Disa ligjvënës e kritikuan shkarkimin e tij. Ndërsa Kryetarja e Dhomës së Përfaqësuesve, demokratja Nancy Pelosi, e cila kurrë nuk foli asgjë të mirë për administratën Trump, më në fund i doli nga goja se Krebs na paska qenë një ekspert i respektuar i sigurisë kibernetike i cili punoi me zell për të mbrojtur zgjedhjet.

Ndryshe, Presidenti Trump pretendon se kishte pasur mashtrime masive në zgjedhje, duke përmendur pretendimet se në zgjedhjet e 3 nëntorit kanë votuar edhe të vdekurit, vëzhguesit janë ndaluar të kenë qasje në vendet e votimit dhe ka pasur gabime të makinës së votimit. Avokatët e tij kanë sfiduar rezultatet e zgjedhjeve në procese gjyqësore të paraqitura në shumë shtete.