Presidenti Trump shkarkon Shefin e Shtabit të Përgjithshëm, Gjeneralin CQ Brown
Presidenti Donald Trump ka shkarkuar papritur Shefin e Shtabit të Përgjithshëm, Gjeneralin CQ Brown, duke larguar kështu një pilot dhe oficer të respektuar, në kuadrin e lëvizjeve për të larguar nga strukturat drejtuese të forcave të armatosura drejtuesit ushtarakë që mbështesin lëvizjen për barazi dhe shumëllojshmëri në radhët e tyre.
Largimi i Gjeneralit Brown, i cili ishte shefi i dytë i shtabit me prejardhje afrikano-amerikane, duket se do të ndihet në mbarë Pentagonin, raporton VOA.
16 muajt e qëndrimit të tij në detyrë u përshkuan nga lufta në Ukrainë dhe zgjerimi i konfliktit në Lindjen e Mesme.
“Dua ta falenderoj Gjeneralin Charles ‘CQ’ Brown për mbi 40 vitet e shërbimit të tij për vendin tonë, përfshirë edhe si Shef i tanishëm i Shtabit të Përgjithshëm. Ai është një xhentëllmen i mirë dhe një udhëheqës i dalluar, dhe i uroj një të ardhme të shkëlqyer atij dhe familjes së tij,” u shpreh Presidenti Trump përmes mediave sociale.
Presidenti Trump tha se do të propozojë Gjeneralin Dan “Razin” Caine, po nga forcat ajrore, për t’u bërë Shefi i ardhshëm i Shtabit të Përgjithshëm.
Presidenti Trump e ndërmori këtë hap megjithë mbështetjen e fortë për Gjeneralin Brown ndër ligjvënës kryesorë dhe një takim që u duk se ishte miqësor në mesin e muajit dhjetor, raporton VOA, kur ata u ulën pranë njëri-tjetrit gjatë lojës së futbollit amerikan ndërmjet Ushtrisë dhe Marinës.
Ndryshe, Gjenerali CQ Brown takohej rregullisht me Sekretarin e Mbrojtjes, Pete Hegseth, i cili mori drejtimin e Pentagonit vetëm katër javë më parë.
