Presidenti Trump: Shumë i zhgënjyer me Presidentin Putin

Presidenti i SHBA-së, Donald Trump, u shpreh sërish i zhgënjyer që pas samitit të tyre në Alaskë shefi i Kremlinit, Vladimir Putin, nuk po bën asnjë përpjekje për të arritur një marrëveshje paqeje me Ukrainën.

“Jam shumë i zhgënjyer nga Presidenti Putin, duhet ta them këtë. Kishim një marrëdhënie të shkëlqyer; jam shumë i zhgënjyer,” tha në një intervistë radiofonike, Presidenti i SHBA-së, Donald Trump.

Trump: Luftë pa kuptim

Trump u ankua edhe më tej gjatë intervistës me drejtuesin e emisionit, gazetarin Scott Jennings, se “mijëra njerëz po vdesin dhe kjo është një luftë që nuk ka kuptim”.

Trump, i cili kishte njoftuar gjatë fushatës së tij zgjedhore se do t’i jepte fund brenda 24 orësh luftës së agresionit të Rusisë në Ukrainë, e cila po zgjat prej më shumë se tre vjet, u takua me Putinin në Alaskë më 15 gusht. Edhe pse Trumpi dhe Putini biseduan për një takim të mëvonshëm tripalësh mes Putinit dhe Presidentit ukrainas Volodymyr Zelenskyy, ky takim deri tani nuk është zhvilluar. Presidenti Trump nuk bëri asnjë deklaratë për pasoja të mundshme të refuzimit të Putinit për takimin.

Zelenskyy: Rusia po dislokon trupa të reja

Sipas Presidentit ukrainas Volodymyr Zelenskyy Rusia po dislokon trupa të reja në disa vija të frontit dhe po vazhdon sulmet ajrore ndaj objektivave ukrainase. Udhëheqësi i Kremlinit Vladimir Putin nuk do të nënshkruajë një marrëveshje paqeje, tha Zelensky në video-fjalimin e tij të mbrëmje. Por Ukraina do të përgjigjet./DW/