Presidenti Trump: Urrejtja nuk ka vend në SHBA!

Pas varsjes së 29 personave në dy sulme me të shtëna me armë zjarri gjatë fundjavës, Presidenti i SHBA , Donald Trump, tha se urrejtja nuk ka vend në Shtetet e Bashkuara, raporton RFE.

Sulmi në një dyqan në El Paso, të Teksasit ka lënë të vdekur 20 persona, derisa nëntë të tjerë kanë vdekur nga të shtënat në Dejton të Ohajos.

Presidenti Trump tha ndoshta duhet të bëhet më shumë për të ndaluar këto sulme.

Megjithatë kritikët shprehen se ai është pjesë e problemit, duke cituar retorikën e tij kundër migrimit dhe kundërshtimeve rreth kontrollit më të rreptë për armët.

I riu 21-vjeçar, që është arrestuar për të shtënat në Teksas besohet se ka postuar online një dokument, duke thënë se sulmi ka qenë përgjigjje ndaj pushtimit hispanik të shtetit.

Megjithatë, ende nuk dihen detajet e sulmuesit në Ohio, i cili ka vrarë motrën e tij dhe tetë persona tjerë.

Duke folur para gazetarëve, Presidenti Trump tha se të shtënat masive duhet të ndalen.

“Kjo gjë ka ndodhur me vite e vite në shtetin tonë dhe duhet të ndalet,” është shprehur ai duke i lidhur të dyja sulmet me “probleme mendore” ndërsa shtoi se sulmuesit kanë qenë “shumë seriozisht të sëmurë mendërisht”.

Mirëpo hetuesit nuk kanë bërë ndonjë koment për gjendjen mendore të këtyre dy personave.

Prokurorët e Teksasit u shprehën se të shtënat në El Paso po trajtohen si “rast i brendshëm terrorist” dhe se ata janë duke “konsideruar seriozisht” ngritjen e padive penale për urrejtje.

Çfarë ka ndodhur në El Paso?

Sulmuesi ka nisur të shtënat me pushkë në dyqanin Walmart ditën e shtunë dhe më pas është dorëzuar pasi është rrethuar nga zyrtarë policorë jashtë objektit.

Ky sulm, që besohet se është i teti në listën e incidenteve më të përgjakshme të këtij lloji në historinë amerikane, ka ndodhur në qytetin ku pjesa më e madhe e popullsisë prej 680,000 personave kanë prejardhje hispanike.

Përveç 20 personave të vdekur, 26 të tjerë janë plagosur në këtë incident.

I dyshuari është identifikuar nga mediat amerikane si Patrick Crusius, banor i zonës së Dallasit.

Ai është akuzuar për vrasje, çka nënkupton se mund të përballet me dënim me vdekje.

Në dokument katër-faqësh që është raportuar të jetë publikuar online vetëm 20 minuta para se të niste sulmi, është shprehur mbështetje për sulmuesin që ka lënë të vdekur 51 persona në Kristçërç të Zelandës së Re në muajin mars.

Çfarë ka ndodhur në Dayton?

Connor Betts, 24-vjeçar, ka nisur të shtënat në një zonë të populluar në orët e para të së dielës.

Në disa pamje të kamerave të sigurisë janë parë dhjetëra persona duke ikur nga disa klube të natës.

Disa sekonda më vonë, sulmuesi shihet duke iu drejtuar kësaj hapësire, kur qëllohet nga policia, teksa arrin te dera.

Policia tha se ai ka pasur plumba shtesë për pushkën e tij.

“Nëse ky individ do arrinte të hynte në klubin e natës me atë sasi të plumbave, do të ndodhin plagosje katastrofale dhe vdekje të personave,” tha shefi policor i Daytonit, Richard Biehl.

Zyrtarët thanë se është shumë herët që të fliten motivet e sulmit.