Presidentit, Hoti kërkon hapjen e misionit diplomatik në Izrael
Kryeministri i Kosovës, Avdullah Hoti, ka dhënë pëlqimin e tij për ti dërguar Presidentit të Kosovës, Hashim Thaçi, kërkesën për hapje të misionit diplomatik në Izrael. Këtë ai e ka bërë të ditur pas takimit konsultativ me ministren për Punë të Jashtme dhe Diasporë, Meliza Haradinaj Stublla.
“Kryeministri theksoi se Izraeli është partner strategjik i Kosovës dhe se vendosja e marrëdhënieve diplomatike në mes të dy vendeve vie si rezultat i marrëveshjes së 4 shtatorit në Shtëpinë e Bardhë,” thekson përmes një komunikate Zyra e Kryeministrit.
Ndryshe, raporton RFE, Kryeministri Hoti dhe presidenti serb, Aleksandar Vuçiç kanë nënshkruar marrëveshjen për normalizimin e marrëdhënieve ekonomike më 4 shtator në Shtëpinë e Bardhë, në praninë e presidentit amerikan, Donald Trump.
Njohja reciproke midis Kosovës dhe Izraelit është e përfshirë në këtë marrëveshje.
Sipas këtij dokumenti, Kosova është zotuar se do të vendosë marrëdhënie diplomatike me Izraelin dhe se do ta hapë misionin e saj diplomatik në Jerusalem, ndërsa Serbia është zotuar se do ta zhvendosë ambasadën e saj ekzistuese në Izrael nga Tel Avivi në Jerusalem.
