Presidentit, Kryesia e Lëvizjes Vetëvendosje propozon Kryeministrin

Kryesia e Lëvizjes Vetëvendosje ka vendosur të bëjë propozimin për Kryeministër të cilin do t’ia dërgojë me shkresë zyrtare Presidentit të Republikës, Hashim Thaçi.

“Pas pranimit të shkresës sonë zyrtare, në respekt të Kushtetutës, Nenit 95 pika 1, dhe Aktgjykimit të Gjykatës Kushtetuese presim që Presidenti t’ia drejtojë Drekretin me propozimin tonë Kuvendit të Republikës së Kosovës,” thekson Lëvizja Vetëvendosje përmes një deklarate duke informuar se ndërkohë kanë rifilluar bisedimet me drejtuesit e Lidhjes Demokratike të Kosovës për marrëveshjen për koalicionin e ardhshëm qeverisës.

Ndryshe, në orën 14:00 është parashikuar takimi i Kryetarit të Lëvizjes Vetëvendosje dhe atij të Lidhjes Demokratike të Kosovës në përpjekje për të finalizuar Marrëveshjen e koalicionit qeverisës.

Njoftimi

Sot u mbajt mbledhja e Kryesisë së Lëvizjes VETËVENDOSJE!. Në respektim të plotë të Kushtetutës së Republikës së Kosovës, Nenit 84 pika 14 dhe Aktgjykimit të Gjykatës Kushtetuese KO 103/14, subjekti ynë do të bëjë propozimin për mandatarin për Kryeministër. Këtë propozim do t’ia dërgojmë me shkresë zyrtare Presidentit të Republikës në ditët në vijim.

Pas pranimit të shkresës sonë zyrtare, në respekt të Kushtetutës, Nenit 95 pika 1, dhe Aktgjykimit të Gjykatës Kushtetuese presim që Presidenti t’ia drejtojë Drekretin me propozimin tonë Kuvendit të Republikës së Kosovës.

Ndërkohë kanë rifilluar bisedimet me drejtuesit e Lidhjes Demokratike të Kosovës për marrëveshjen për koalicionin e ardhshëm qeverisës.

8 janar 2020
Lëvizja VETËVENDOSJE!