Presidentja cakton 18 dhjetorin, datë të zgjedhjeve të jashtëzakonshme në veri

Pas përfundimit të konsultimeve me partitë politike dhe me KQZ-në, Presidentja e Kosovës, Vjosa Osmani, ka caktuar 18 dhjetorin, si datë të mbajtjes së zgjedhjeve  të jashtëzakonshme për kryetarë të komunave në Mitrovicë të Veriut, Zubin Potok, Leposaviç dhe Zveçan.

“Udhëzohet  Komisioni Qendror i Zgjedhjeve i Republikës së Kosovës t’i ndërmarrë të gjitha veprimet e nevojshme për organizimin dhe mbajtjen e zgjedhjeve për Kryetar të Komunave: Mitrovica e Veriut, Zubin Potok, Leposaviç dhe Zveçan, në përputhje me ketë vendim dhe ligjin në fuqi”, thuhet në vendimin e Presidentes Osmani për caktimin dhe shpalljen e datës së zgjedhjeve të jashtëzakonshme për  kryetar të katër komunave në veri të vendit.

“Pas takimit me përfaqësues të partive politike, Presidentja Osmani ka potencuar se do t’i drejtojë një kërkesë partnerëve ndërkombëtarë për monitorim të zgjedhjeve dhe pjesëmarrje sa më të madhe ndërkombëtare në këtë proces zgjedhor”, njofton zyra për informim e Presidentes.

Presidentja Vjosa Osmani, gjithashtu ka theksuar se institucionet e sigurisë do t’i ndërmarrin të gjitha masat në mënyrë që qytetarët pa dallim etnie, të  ndihen të mbrojtur, të sigurt dhe t`i realizojnë të drejtat e tyre kushtetuese.