Presidentja e Kosovës: Të përshpejtohet procesi i zbardhjes së fatit të të zhdukurve

Presidentja e Kosovës, Vjosa Osmani në takim me Drejtorin Rajonal të Komitetit Ndërkombëtar të Kryqit të Kuq për Evropën dhe Azinë Qendrore, Martin Schuepp e informoi për përkushtimin e institucioneve të reja të Kosovës për zbardhjen sa më të shpejtë të fatit të 1639 personave të zhdukur me dhunë gjatë luftës së Kosovës, por për shkak të sjelljes së Serbisë, procesi po shkon tepër ngadalë.

“Për institucionet tona, zbardhja e fatit të tyre përbën jo vetëm prioritet politik, por edhe detyrim njerëzor, prandaj ne nuk duam ta trajtojmë këtë proces vetëm si politik, por, mbi të gjitha si humanitar,” tha Presidentja Osmani duke shtuar se është detyrë e institucioneve që ta dëgjojnë zërin e familjeve të të zhdukurve, të bëhen zëri i tyre dhe ne po sigurohemi që të bëjmë gjithçka që familjet të trajtohen dinjitetshëm dhe që të marrin sa më shpejt që të jetë e mundur informata mbi fatin e më të dashurve të tyre.

“Procesi po shkon tepër ngadalë, Serbia nuk po tregon gatishmëri për ta zbardhur fatin e këtyre personave, prandaj bashkësia ndërkombëtare duhet ta rrisë presionin mbi Serbinë, që ajo të ofrojë informata për secilin person të zhdukur dhunshëm.”

Ndërkaq, Martin Schueppe nga ana e tij njoftoi Presidenten e Kosovës, Vjosa Osmani, për përpjekjet që kjo organizatë po i bën për të siguruar të dhëna për personat e zhdukur.