Presidentja e Kosovës: ASHAK, qendra ku lindën idetë që i dhanë themel shtetit tonë!
ASHAK është qendra ku u formësua mendimi politik dhe institucioni ku lindën idetë, që i dhanë drejtim, kuptim e themel shtetit tonë, tha Presidentja e Kosovës, Vjosa Osmani, në 50 vjetorin e themelimit të Akademisë së Shkencave dhe Arteve të Kosovës,
“Prej pesë dekadash akademikët tanë kanë punuar në rrethana të vështira kohë pas kohe, por synimi ishte të mbrohet gjuha, kultura, e mbi të gjitha interesi kombëtar.
Akademikët kanë kontribuar në formim politik, arsimor e kulturor dhe e kanë lidhë shtetin tonë me qendrat botërore të dijes. Kanë artikuluar idetë, të cilat i dhanë kuptim rrugës sonë për një shoqëri të vlerave, për një shtet modern e të integruar në institucionet euroatlantike,” tha Vjosa Osmani duke shtuar se në çdo fazë të historisë sonë Akademia jonë ka qenë një nga institucionet që nuk është dorëzuar ndërsa përfundoi:
“Studimet, arkivat, botimet, krijimtaria letrare-artistike kanë mbajtur gjallë ëndrrën tonë për liri e shtet!”
Ndërsa Kryetari i Akademisë së Shkencave dhe Arteve të Kosovës, Mehmet Kraja, duke fol për 50 vjetët e punës së Akademisë tha se ASHAK-u ndau fatin e vështirë të historisë e gjeografisë së vendit të vetë.
“Bashkë me këtë histori duhet bërë të ditur se Akademia u themelua si e Kosovës dhe e tillë mbeti deri në ditët e sotme, dhe e tillë do të jetë edhe në të ardhmen në të gjitha fazat e zhvillimit të punës së saj. Ajo ndau fatin e vështirë të historisë e gjeografisë së vendit të vetë. Akademia u quajt e Kosovës dhe bashkë me vendin ku u themelua i bëri 50 vjet jetë në një rrugë të vështirë të emancipimit e lidhur ngushtë me vlerat më të larta të humanizmit, mendimit të lirë dhe të progresit. Themelimi të akademisë i kanë paraprirë disa rrethana specifike të zhvillimeve shoqërore e politike në vend,” tha Mehmet Kraja duke theksuar se Ai tha se sfida më e madhe e Akademisë së Kosovës mbetet konsolidimi dhe pavarësia e saj institucionale ndërsa përfundoi:
“Historia e saj është e lidhur ngushtë me historinë e shtetit të Kosovës duke qenë jo vetëm mbështetëse e të gjitha proceseve politike që e quan Kosovën drejt pavarësisë, ndonjëherë edhe ideatorë e këtyre lëvizjeve me interes për shoqërinë dhe emancipimin e saj shoqëror e kulturor”, tha Kraja.
Ndryshe, në ceremoninë e 50 vjetorit të themelimit të ASHAK, përveç zyrtarëve të lartë shtetëror nga Kosova e Shqipëria, përfaqësues akademish nga vende të ndryshme e ambasador të akredituar në Kosovë, ishin edhe Nënkryetarja e ALLEA-s, Prof.Marie Louise Nosch, kryetari i Akademisë së Shkencave dhe të Arteve të Sllovenisë, Prof.Dr.Peter Štih, kryetari i Akademisë së Shkencave dhe të Arteve të Malit të Zi, Dr.Ljubiša Stanković, kryetari i Akademisë së Shkencave dhe të Arteve të Maqedonisë së Veriut, Akademik Živko Popov, Nënkryetarja e Akademisë së Shkencave dhe të Arteve të Bosnje Hercegovinës, Akademike Lidija Lindencer Cvijetić, përfaqësuesi i Akademisë Kombëtare të Linceit, Prof.Massimo Della Valle, koordinatori i Procesit të Berlinit për Arsim, Shkencë dhe Inovacion, Lucian Brujan.
