Presidentja e Kosovës: FSK po dëshmon se është e gatshme t’i bashkohet NATO-s
Rruga e Kosovës drejt integrimeve euroatlantike është e qartë dhe e pakthyeshme, tha Presidentja Vjosa Osmani, ndërsa Forca e Sigurisë së Kosovës, FSK, çdo ditë po dëshmon se është e denjë për të qenë pjesë e strukturave ndërkombëtare të sigurisë dhe mbrojtjes.
Në ceremoninë e gradimit të 334 ushtarëve të rinj të FSK-së, Presidentj e Kosovës tha se këta ushtarë të rinj po bëhen pjesë e një force që çdo ditë po zhvillohet e po bëhet një ushtri moderne e profesionale, e gatshme për t’u përballur me çdo sfidë.
“FSK po marshon fuqishëm përpara në procesin e avancimit si forcë moderne, e mirëpajisur dhe e mirëtrajnuar. Ushtria jonë çdo ditë e më shumë po dëshmon gatishmërinë e plotë për të përmbushur standardet më të larta të NATO-s, aty ku Kosova e ka vendin dhe e meriton vendin,” tha Vjosa Osmani për
FSK-në, një aleate e besueshme e partnerëve ndërkombëtarë dhe garanci për paqe dhe siguri për Kosovën.
Ushtarët e rinj u janë nënshtruar trajnimeve bazike, që kanë zgjatur për nëntë javë.
Kryeministri i Kosovës, Albin Kurti, tha se gjatë mandatit katërvjeçar janë rekrutuar 2.315 ushtarë të rinj. Sipas tij, në muajt në vijim, atyre do t’iu shtohen edhe 390 ushtarë, duke bërë që numri total i rekrutimeve të reja të arrijë në 2.705 ushtarë.
“Ju jeni garancia më e fuqishme që populli i Kosovës do të jetojë në paqe, integriteti territorial do të jetë i pacenueshëm dhe sovraniteti i paprekshëm. Në realizim të këtij vizioni mbështetja e Qeverisë do të jetë e padiskutueshme sepse e tillë është vendosmëria jonë për të ngritur e zhvilluar kapacitetet tona mbrojtëse,” tha Albin Kurti duke theksuar investimet në amramtim të Qeverisë në vlerë prej 319 milionë eurosh, blerjen e dronëve Bayraktar nga Turqia, sistemet kundërtanke Javelin nga Shtetet e Bashkuara, dhe së shpejti Kosova do të ketë në inventar edhe helikopterët amerikanë, Black Hawk, ndërsa përfundoi:
“Synimi ynë është i qartë ndërtimi dhe rritja e një ushtrie që respekton standardet më të larta të NATO-s dhe që është pjesë aktive e arkitekturës së sigurisë ndërkombëtare demokratike. Kosova nuk është një shtet që kërkon vetëm mbështetje, Kosova është një partnere që kontribuon, që investon dhe që garanton sigurinë rajonale.”
Së fundi, Kosova ka iniciuar hapjen e një fabrike për prodhimin e municioneve në Kosovë, por edhe të dronëve.
Përveç industrisë së mbrojtjes, institucionet kanë ndërmarrë hapa në thellimin e bashkëpunimit në fushën e mbrojtjes dhe sigurisë me Shtetet e Bashkuara, por edhe me shtete të tjera rajonale, që janë pjesë e NATO-s, sikurse Kroacia dhe Shqipëria.
Thellimi i bashkëpunimit në mbrojtje vjen në kohën kur po vazhdon procesi i transformimit të FSK-së në ushtri, proces që pritet të përmbyllet më 2028.
Ministria e Mbrojtjes ka konfirmuar më herët për RFE se numri i pjesëtarëve të FSK-së ka kaluar 4.300 dhe se vitin e ardhshëm pritet të arrijë në mbi 5.000.
Kosova mëton që një ditë të bëhet pjesë e strukturave të aleancës ushtarake perëndimore të NATO-s, por ka pengesa në këtë drejtim, pasi në aleancë janë katër shtete që ende nuk e njohin pavarësinë e Kosovës./RFE/
