Presidentja e Kosovës: Fuqizimi i grave gurthemel i përparimit tonë!

Presidentja e Kosovës, Vjosa Osmani në ceremoninë e nënshkrimit të 53 granteve në vlerë prej 530 mijë $ të mbështetur nga USAID, tha se fuqizimi i grave është gurthemel i përparimit tonë të përgjithshëm.

“Në fushën e ngritjes së zhvillimit ekonomik fuqizimi i grave qëndron si një gurthemel i përparimit tonë të përgjithshëm. Arritjet e sipërmarrëseve gra në Kosovë nuk janë vetëm suksese individuale,ato janë arritje kolektive që ngrisin dhe fuqizojnë të gjithë shoqërinë tonë,” tha Vjosa Osmani duke shtuar se gratë jo vetëm që fuqizojnë bizneset dhe familjet e tyre, por edhe kontribuojnë në shoqëri në mënyrë të konsiderueshme, si në përmirësimin e strukturës ekonomike dhe sociale të shtetit.

Ndryshe, ceremonia shënon nënshkrimin zyrtar të 53 granteve, me një vlerë totale prej rreth 530.000 $, nga të cilat përfitojnë bizneset në pronësi të grave dhe minoriteteve.

Kjo ngjarje përbën një komponent të rëndësishëm të Aktivitetit Zhvillimi Gjithëpërfshirës Ekonomik të USAID-it, një partneritet pesëvjeçar me Fondin për Zhvillim Komunitar, CDF.

Objektivi kryesor është që të forcohen bizneset, të përmirësohen kapacitetet e tyre prodhuese dhe shërbyese si dhe të përmirësohen ato në aspektin konkurrues në tregjet lokale dhe rajonale.

Pas ceremonisë së nënshkrimit, në panairin e produkteve u prezantuan ofertat nga 25 biznese në pronësi të grave dhe minoriteteve.