Presidentja e Kosovës: Izbica është kujtesë që s’guxon të zbehet dhe thirrje për drejtësi

Duke përkujtuar 27 vjetorin e Masakra e Izbicës, Presidentja e Kosovës, Vjosa Osmani, e cilësoi këtë ngjarje si një nga dëshmitë më të rënda të krimeve të kryera ndaj civilëve shqiptarë gjatë luftës në Kosovë.

“Izbica nuk përfaqëson vetëm dhimbjen dhe çmimin e lirisë, por edhe një kujtesë që nuk duhet të zbehet kurrë dhe një thirrje të vazhdueshme që drejtësia të mos vonojë.
147 civilë të pafajshëm u vranë mizorisht nga forcat serbe, ndër ta edhe foshnja 6-muajshe Dafina Qelaj, një simbol i pafajësisë së shuar në mënyrë barbare,” tha Vjosa Osmani duke shtuar se këto krime u kryen me qëllim të shfarosjes së popullit shqiptar dhe si të tilla duhet të marrin përgjigjen e merituar nga drejtësia ndërkombëtare dhe ajo vendore.
Në fund, Presidentja e Kosovës, Vjosa Osmani, duke bërë thirrje për ruajtjen e kujtesës kolektive dhe përkushtim të vazhdueshëm në kërkimin e drejtësisë për viktimat, përfundoi:

“Krimet e Serbisë duhet të përballen me drejtësinë. Kujtimi për të rënët është obligim, ndërsa drejtësia për ta mbetet amanet.”