Presidentja e Kosovës: Liria mban edhe emrat e Jusufit, Bardhoshit e Kadriut!

Liria mbanë edhe emrat e Jusufit, Bardhoshit e Kadriut, tha Presidentja e Kosovës, Vjosa Osmani pasi së bashku me Kryetarin e Parlamentit,  Glauk Konjufca, qëndruan sot në familjen e heroit Jusuf Gërvalla, në fshatin Dubovik të Deçanit.

“Së bashku me Kryetarin Konjufca, u pritëm sot nga e bija e heroit Jusuf Gërvalla, Zv.kryeministrja Donika Gërvalla, në votrën e tyre, në Dubovik, ku nderuam kujtimin për shenjat e shenjta, të cilët përbëjnë fillet e luftës sonë për çlirim kombëtar,” u shpreh Vjosa Osmani përmes rrjetit social Facebook duke shtuar se liria mbanë edhe emrat e Jusufit, Bardhoshit e Kadriut, kurse ne mbajmë të skalitur emrat e tyre jo vetëm në kujtesë, por edhe si referencë se si një jetë e tërë vihet në shërbim të atdheut!

“Jusufi ishte jo vetëm një zë i veçantë në letërsi, gazetari e muzikë, por mbi të gjitha zëri i të vërtetës dhe lirisë sonë! Ai lindi artist, veproi si patriot e vdiq si hero. Gërshetimi i këtyre tri tipareve e shndërroi Jusufin në një personalitet poliedrik, një ikonë të kohës, një patriot që ëndrrën për liri e projektoi herët,” tha Presidentja e Kosovës, Vjosa Osmani duke përfunduar:

“I përjetshëm qoftë kujtimi për Jusuf e Bardhosh Gërvallën dhe Kadri Zekën!”