Presidentja e Kosovës nesër dorëzon në Gjykatën Kushtetuese komentet për konstituimin e Parlamentit
Presidentja Vjosa Osmani, nesër do të dorëzojë në Gjykatën Kushtetuese komentet lidhur me procesin e konstituimit të Parlamentit të Kosovës.
“Siç e dini, Gjykata Kushtetuese tashmë ka vendosur masë të përkohshme deri më 30 shtator. Në lidhje me meritat e rastit, Presidentja do t’ia dorëzojë Gjykatës Kushtetuese komentet e saj për çështjen në fjalë brenda afatit të përcaktuar nga Gjykata, pra nesër më 9 shtator,” tha këshillëtari i Presdenetes së Kosovës, Bekim Kupina, duke sqaruar se kjo bëhet me qëllim që të mos bllokohet krijimi i institucioneve.
“Qëndrimi i Presidentes gjithnjë ka qenë se askush nuk duhet ta ketë të drejtën t’i bllokojë institucionet, e rrjedhimisht shtetin. Ashtu siç parashihet në 57 (4) të Kushtetutës, realizimi i të drejtave të komuniteteve është i pandashëm nga detyrimi për t’i respektuar ligjet e Republikës së Kosovës dhe për të mos i cenuar të drejtat e të tjerëve.”
Ndryshe, duke miratuar kërkesën e 9 deputetë serbë të Listës Srpska dhe 1 deputeti goran, me përfaqësues Igor Simiç, Gjykata Kushtetuese e Kosovës ka vendosur masën e përkohshme duke ndaluar çdo veprim të deputetëve të zgjedhur të Parlamentit të Kosovës dhe çdo procedurë për formimin e Qeverisë deri më 30 shtator 2025.
Deputetët e Listës Srpska dhe deputeti goran i linjës Dragash-Beograd, Adem Hoxha, kërkuan vlerësimin e kushtetutshmërisë së procesverbaleve të seancave të Parlamentit të mbajtura më 26 dhe 28 gusht 2025, si dhe vendimeve të nxjerra në këto seanca për votimin e Nënkryetarin serb në Parlamentin e Kosovës.
