Presidentja e Kosovës nesër takim me krerët e partive politike

Pasi i mandatuari i parë për krijimin e qeverisë, lideri i Lëvizjes Vetëvendosje, Albin Kurti, dështoi të krijonte qeverinë të dielën e 26 Tetorit, sot Presidentja e Kosovës, Vjosa Osmani ka ftuar liderët e partive politike për një takim që pritet të zhvillohet nesër në orën 12:00.

Sipas Kushtetutës, Presidentja e Kosovës duhet të mandatoj një person tjetër për formimin e qeverisë brenda 10 ditësh, por nuk dihet se cilët do të jenë hapat e Vjosa Osmanit pasi vullneti i partive parlamentare për të një koalicion qeverisës mungon.

Ndonëse në takim me Presidenten me liderët e partive politike nesër pritet të diskutohet dhe rëndësia e miratimit të buxhetit të Kosovës për vitin 2026 dhe miratimin e Planit të Rritjes së BE-së, ditë më parë zëdhënësi i Presidentes, Bekim Kupina, bëri të ditur qëllimin e takimit.

“Presidentja do t’i inkurajojë partitë politike të bashkëpunojnë për ta shmangur çdo bllokadë që mund të ndikojë negativisht në mirëqenien e qytetarëve dhe në funksionimin e institucioneve të Kosovës,” tha Bekim Kupina.

Në përpjekje për krijimin e qeverisë, Albin Kurti sqaroi se Lidhja Demokratike e Kosovës dhe Nisma nuk deshën të bashkëpunonin me të, ndërsa ai vetë nuk e donte PDK-në në bashkëqeverisje. Në këtë situatë, pasi nuk arriti të marrë votat e shumicës në parlament, ai paralajmëroi zgjedhje të reja në dhjetor.

Pas këtij dështimi të Kurtit, kryetari i partisë së dytë më të votuar në zgjedhjet e 9 shkurtit 2025, PDK, Memli Krasniqi, hodhi poshtë mundësinë se do të bëhet mandatar i radhës, në rast se Presidentja i jep këtë mundësi.