Presidentja e Kosovës nis më 15 maj konsultimet për konstituimin e Parlamentit

Presidentja e Kosovës, Vjosa Osmani, do të nisë më 15 maj një seri konsultimesh me përfaqësues të subjekteve politike në lidhje me procesin e konstituimit të Parlamentit të ri pas zgjedhjeve të mbajtura më 9 shkurt.

Këshilltari për media në Presidencë, Bekim Kupina, konfirmoi se ftesat për takimet e para tashmë janë dërguar dhe se aktualisht janë duke pritur konfirmimet nga përfaqësuesit politikë.

“Presidentja Osmani do të fillojë një seri konsultimesh rreth çështjes së konstituimit të Kuvendit nga data 15 maj. Ftesat tashmë janë dërguar për takimet e para dhe po presim konfirmimet,” tha Bekim Kupina.

Ndryshe, disa nga krerët e partive politike e kanë parë të domosdoshme përfshirjen e Presidentes Vjosa Osmani në tejkalimin e bllokadës për konstituimin e legjislaturës së nëntë të Parlamentit të Kosovës, pasi as pas 14 përpjekjesh Parlament nuk ka arritur të finalizojë konstituimin e kësaj legjislature.