Presidentja e Kosovës propozon marrëveshje strategjike me Mbretërinë e Bashkuar

Presidentja e Kosovës, Vjosa Osmani ka propozuar marrëveshje strategjike me Mbretërinë e Bashkuar në Mbrojtje e Ekonomi, propozim ky që u mirëprit nga Sekretari britanik i Jashtëm, David Lammy.

“Siç diskutuam gjatë takimit, e vlerësoj shumë faktin që e keni mirëpritur propozimin tim për një thellim dhe zgjerim të partneritetit përmes një dialogu të avancuar strategjik në këto fusha. Jemi të përkushtuar të vazhdojmë bashkëpunimin në mes të ekipeve dhe institucioneve tona për ta konkretizuar këtë partneritet dhe për t’i dhënë formën e duhur. Konsideroj se ka hapësirë të jashtëzakonshme për fuqizim të mëtutjeshëm të aleancës sonë dhe prezencë akoma më aktive të Mbretërisë së Bashkuar në Kosovë dhe anasjelltas,” tha Vjosa Osmani pas takimit ndërsa Sekretari Lammy tha të jetë mirënjohës për mundësinë që si Sekretar i Punëve të Jashtme të avancojnë partneritetin strategjik.

“Dhe, janë disa fusha si inovacioni e teknologjia, energjia e pastër që e shohim këtu në Kosovë. Pasi të dy vendet tona kanë bërë zotime për të rritur shpenzimet në fushën e  mbrojtjes, ka shumë gjëra që mund të bëjmë së bashku gjatë kësaj periudhe. Presidentja dhe unë kemi diskutuar bashkëpunimin në një marrëdhënie më të strukturuar mes nesh në muajt e ardhshëm dhe shpresoj se do të kthehem në Kosovë përderisa e zhvillojmë atë partneritet,”, tha David Lammy.

Një temë e rëndësishme e diskutimit tonë ishte edhe dialogu me Serbinë, tha Presidentja e Kosovës pas takimit me Sekretarin e Jashtëm të Mbretërisë së Bashkuar.

“Kam ripërsëritur edhe njëherë faktin Kosova mbetet një palë konstruktive e përkushtuar për paqe e stabilitet, pavarësisht se vazhdimisht përballemi me obstruksione e provokime nga ana e Serbisë, përfshirë edhe sulmet e njëpasnjëshme që kanë filluar vite më herët, e po vazhdojnë edhe tani”, tha presidentja e cila ka ripërsëritur kërkesën që autorët të përballen me drejtësinë.

“Është e domosdoshme që duhet të ketë llogaridhënie e vënie të të autorëve para përgjegjësisë nga ana e Serbisë, Por fatkeqësisht po e  shohim që nuk ka asnjë lëvizje nga ana e Serbisë as sa i përket aktit të agresionit të shtatorit 2023, as sa i përket sulmit të ushtarëve të NATO-s, por as të veprimeve të fundit terroriste që kanë ndodhur në veri të vendit,” tha Presidentja Osmani duke falënderuar Mbretërinë e Bashkuar për mbështetjen e vazhdueshme që i kanë dhënë Kosovës.

“Diskutuam edhe për të ardhmen euroatlantike të Kosovës, një aspiratë që Mbretëria e Bashkuar e ka mbështetur që nga fillimet e raporteve tona,  siç ka qenë e fuqishme mbështetja e Mbretërisë së Bashkuar për anëtarësimin e Kosovës në Këshillin e Evropës,” tha Presidentja Vjosa Osmani duke theksuar se mirëprest angazhimin e Ministrisë së Mbrojtjes së Mbretërisë së Bashkuar edhe sa i përket eksportit të armëve në Kosovë ndërsa përfundoi:

“Ky hap do të kontribuojë jo vetëm në forcimin e sigurisë sonë, por edhe në avancimin e industrisë së mbrojtjes së Britanisë së Madhe.”

Kurti: Radoiçiç endet i lirë në Serbi, ai duhet të ekstradohet në Kosovë

Ndërsa Kryeministri i Kosovës, Albin Kurti, gjatë një darke pune me Sekretarin e Jashtme të Mbretërisë së Bashkuar, David Lammy dhe të Dërguaren e Posaçme për Ballkanin Perëndimor, Karen Pierce, tha se ende nuk ka drejtësi dhe llogaridhënie për sulmin terrorist në Banjskë, teksa Milan Radoiçiç endet i lirë dhe i mbrojtur nga aparati shtetëror serb. Me këtë rast, Kurti tha duke theksuar ai duhet të ekstradohet në Kosovë siguroi se do të ballafaqohet me një gjykim të drejtë për veprat e tij.

Duke falënderuar Sekretarin e Shtetit dhe Mbretërinë e Bashkuar për kontributin dhe mbështetjen gjatë etapave të shtetndërtimit dhe miqësinë e partneritetin e ngushtë mes dy vendeve tona, Kryeministri Kurti veçoi atë mes FSK-së dhe institucioneve britanike të mbrojtjes dhe sigurisë.

Albin Kurti uroi Sekretarin Lammy dhe të Dërguaren e Posaçme Karen Pierce për pritjen e Samitit të Procesit të Berlinit këtë vit nga ana e Mbretërisë së Bashkuar, duke i ofruar bashkëpunim për ta bërë këtë samit sa më të suksesshëm.

Sekretari Lammy u informua nga Kryeministri Kurti me progresin demokratik dhe zhvillimin ekonomik që ka njohur Kosova gjatë këtij mandati qeverisës, të dëshmuar dhe nga rankimet pozitive në indekset ndërkombëtare në fusha si, sundimi i ligjit, lufta kundër korrupsionit, dhe demokracia liberale e elektorale.

Ai u informua edhe për investimet në fushën e mbrojtjes dhe arritjen e nivelit të buxhetit për mbrojtje në 2% të BPV-së si standard i NATO-s, si dhe objektivat e synimet parësore të Kosovës për anëtarësim në NATO, Bashkim Evropian dhe në Këshillin e Evropës.

Në takim me Sekretarin e Jashtëm të Mbretërisë së Bashkuar, David Lammy, Kryeministri i Kosovës, Albin Kurti diskutoi edhe rreth situatës aktuale në rajon dhe asaj gjeopolitike në Evropë, si dhe çështjet e sigurisë.