Presidentja e Kosovës: Serbia mban të gjallë krimin përmes varrezave masive!

Serbia po kryen çdo ditë kryen krim kundër njerëzimit duke i mbajtur të zhdukurit me dhunë në varreza masive, tha Presidentja e Kosovës, Vjosa Osmani, pas homazheve që bëri me kryeparlamentarin Dimal Basha dhe kryeministrin, Albin Kurti, te Monumenti i Personave të Zhdukur, në shënim të Ditës Ndërkombëtare të të Zhdukurve me Dhunë, duke shtuar se Serbia çdo ditë shkelë Konventa Ndërkombëtare për të Drejtat e Njeriut.

“Sot në ditën ndërkombëtare të të zhdukurve,sikurse edhe çdo vit jemi bashkë me familjet e të zhdukurve me dhunë nga lufta e fundit në Kosovë për të përkujtuar secilin prej tyre, por po ashtu për ta ngritur zërin tonë edhe njëherë për drejtësi, dhe për ashtu për ta ngritur zërin tonë për këtë krim të vazhdueshëm të Serbisë.

Them që është krim i vazhdueshëm, sepse përtej krimeve që janë kryer në në vitin 1998-1999 nga ana e Serbisë, zhdukja me dhunë e personave, të dashurve të shumë familjeve këtu në Kosovë, është krim që Serbia e kryen çdo ditë duke i mbajtur ata në varreza masive, duke mos respektuar marrëveshjet e arritura në Bruksel për ta zbardhur fatin e këtyre të zhdukurve me dhunë, Serbia çdo ditë kryen krim kundër njerëzimit  dhe çdo ditë shkelë konventa ndërkombëtare për të drejtat e njeriut,” tha Vjosa Osmani duke u solidarizuar me familjet të cilët akoma jetojnë në ankth e në dhimbje të pafund edhe 26 vjet pas luftës.

“Por përtej fjalëve, jemi bashkë me familjet në përpjekjet tona të vazhdueshme për drejtësi dhe në përpjekjet tona të vazhdueshme për ta mbajtur Serbinë përgjegjëse për këtë krim të përsëritur. I bëjmë thirrje edhe njëherë të gjithë aleatëve tanë, të gjithë miqve tanë ndërkombëtar që t’i bëjnë presion të vazhdueshëm Serbisë, këtij shteti gjenocidal.”

Duke nderuar kujtimin e tyre, Kryetari i Parlamentit, Dimal Basha, kërkoi që zbardhjen sa më të shpejtë të fatit të personave të pagjetur.

“Ky është një obligim moral dhe ndërkombëtar që Serbia të tregojë sa më parë vendndodhjen e masakrave dhe të personave të zhdukur,” tha Dimal Basha ndërsa Kryeministri në detyrë, Albin Kurti, shtoi se institucionet shtetërore po punojnë me përkushtim për gjetjen e të zhdukurve.

“Vetëm gjatë vitit të fundit kemi gjurmuar mbi 23 lokacione të ndryshme, ndërsa këtë vit kemi realizuar 18 aktivitete kërkimore për zbulimin e mbetjeve mortore të më të dashurve tanë.”

Ndryshe, aktualisht, në Kosovë ende figurojnë të zhdukur rreth 1.600 persona, fati i të cilëve mbetet ende i panjohur.