Presidentja e Kosovës shpërndan Parlamentin, zgjedhjet e jashtëzakonshme më 28 Dhjetor

Pas takimit me liderët e partive parlamentare, Presidentja e Kosovës Vjosa Osmani, ka firmosur dekretin për shpërndarjen e Parlamentit ndërkohë pritet dhe vendimi për shpalljen e zgjedhjeve.

Liderët e partive parlamentare kanë propozuar dy data për mbajtjen e zgjedhjeve të jashtëzakonshme, 21 Dhjetor dhe 28 Dhjetor!

“Në përputhje me Kushtetutën e Republikës së Kosovës dhe legjislacionin në fuqi, si dhe pas pranimit sot të vendimit të Kuvendit të Kosovës lidhur me dështimin e krijimit të Qeverisë edhe nga mandatari i dytë, Presidentja e Republikës së Kosovës ka shpërndarë sot Legjislaturën e nëntë të Republikës së Kosovës,” ka sqaruar Presidentja e Kosovës, Vjosa Osmani, vendimin për të shpërndarë Parlamentin.

Pas këtij dekreti, bazuar në diskutimet me liderët e partive parlamentare, dhe eliminimin e disa nga sfidat e organizimit të shpejtë të zgjedhjeve, ka vendosur të dekretoj datën e zgjedhjeve të jashtëzakonshme parlamentare, 28 dhjetorin.

“Tetë parti janë deklaruara për datën 28, pesë parti për datën 21 dhe 3 parti për cilëndo datë. 28 dhjetorin e kam vlerësuar që mbetet data e vetme e mundshme, edhe pse edhe kjo datë do të ketë sfida për KQZ-në”, tha Vjosa Osmani duk erikujtuar se zgjedhjet lokale nuk kanë përfunduar akoma sa i përket procedurës së certifikimit.

“Para fillimit të fushatës janë një sërë veprimesh, që janë regjistrimi i subjekteve dhe koalicioneve, certifikimi i kandidatëve, hedhja e shortit e veprime të tjera. Për më tepër, duhen së paku dy javë kohë për të mundësuar votimin jashtë vendit dhe sipas ligjit, shtetasve që jetojnë jashtë vendit duhet dhënë së paku 15 ditë afat me qëllim të aplikimit dhe regjistrimit për të votuar”, tha Presidentja e Kosov duke përfunduar:

“Në mesin e këtyre janë edhe procedura tenderuese e çka jo tjetër. Pra, të gjitha këto e bëjnë praktikisht të pamundshme edhe datën 21 dhjetor, rrjedhimisht data 28 dhjetor është data që kam vlerësuar se mbetet data e vetme e mundshme, sado që edhe kjo datë paraqet deri diku sfida për Komisionin Qendror të Zgjedhjeve”

Ndryshe, ky takim i Presidentes së Kosovës, Vjosa Osmani, me liderët e partive politike për të diskutuar datën e zgjedhjeve të jashtëzakonshme parlamentare u zhvillua një ditë pas dështimit të votimit të mandatarit të dytë për Kryeministër, kandidatin e Lëvizjes Vetëvendosje, Glauk Konjufca.

Pas takimit, Kryetari i Partisë Demokratike të Kosovës, Bedri Hamza, tha se ka propozuar datën 21 dhjetor për mbajtjen e zgjedhjeve të jashtëzakonshme. 

“Ne kemi pasur një shtyrje të vazhdueshme dhe bllokadë në krijimin e institucioneve që bie barrë e partisë që ka fituar numrin më të madh të votave, dhe vendi ka nevojë sa më shpejtë të ketë institucione. Nuk shkon në të njëjtën kohë edhe me kërkuar urgjencë në krijim të institucioneve por me kërkuar edhe datë sa më të vonshme të zgjedhjeve. Dhe data tjetër ka qenë 28, dhe ne kemi qenë në datën e 21 për shkak se është edhe datë para ndërrimit të vitit”, deklaroi Hamza. Ai ka deklaruar edhe njëherë atë që e tha sapo u bë kryetar i PDK-së, se nuk ka vija të kuqe për asnjë parti politike,” tha Kryetari i PDK, Bedi Hamza duke përsëritur edhe me këtë rast:

“PDK, unë si kryetar i PDK, nuk kemi vija të kuqe për as një subjekt politik!”

Drejtuesi i “Guxo”, Faton Peci, tha se ata kanë propozuar 28 dhjetorin si datë për mbajtjen e  zgjedhjeve të jashtëzakonshme.

“Pati diskutime të ndryshme rreth opsionit më optimal dhe të favorshëm për qytetarët e Republikës së Kosovës. Në mes dy datave 21 e 28 dhjetor, ne kemi preferuar datën 28 dhjetor. Arsyet janë të thjeshta për shkak që Komisioni Qendror i Zgjedhjeve ende nuk ka certifikuar rezultatin e zgjedhjeve lokale. Për shkak të nevojës që të kemi përgatitje më të mirë edhe nga KQZ edhe të partive politike, por njëkohësisht edhe për nevojën e të organizimit më të mirë edhe të ambasadave e konsullatave në vendet e BE-së por edhe përtej në SHBA, ky ishte propozimi ynë,” tha Faton Peci ndërsa bëri të ditur se kishte propozuar që të mbahej një seancë ku do të shqyrtoheshin disa pika të rëndësishme, përfshirë buxhetin e RTK-së, por tha se nuk pati dakordim nga parti të tjera.

Kryetari i Nismës Socialdemokrate, Fatmir Limaj, pas përfundimit të takimit tha se sot ka qenë dashur që të deklarohet krijimi i qeverisë dhe kjo është fatkeqësi. Kosova, tha ai, po shkon drejt zgjedhje të reja me humbje.

Ndërsa Kryetari i Aleancës për Ardhmërinë e Kosovës, Ramush Haradinaj, tha se sot është nënshkruar dekreti për shpërndarjen e Parlamentit. Sipas tij, datat e propozuara janë 21 dhe 28 dhjetor.