Presidentja e Kosovës takim me Të dërguarin e Posaçëm të BE për dialogun Kosovë-Serbi
Zhvillimet e fundit në procesin e dialogut në Bruksel, perspektiva evropiane e Kosovës dhe liberalizimi i vizave për qytetarët e Kosovës ishin temat e takimit që Presidentja Vjosa Osmani zhvilloi me Të dërguarin e Posaçëm të Bashkimit Evropian për Dialogun Kosovë-Serbi, Miroslav Lajçak.
“Presidentja foli për angazhimin konstruktiv të Kosovës në dialogun me Serbinë, duke përçuar synimin e qartë të institucioneve tona që procesi të jetë i përqendruar në njohjen e ndërsjellë. Presidentja Osmani theksoi se marrëveshja mbi zbatimin e udhërrëfyesit të energjisë është hap pozitiv në këtë aspekt, duke përmendur se zbatimi është shumë i rëndësishëm,” thuhet në njoftim e Presidencës së Kosovës duke shtuar se Presidentja Osmani ritheksoi urgjencën për progres në marrëveshjen për personat e zhdukur me dhunë, e cila mbetet plagë e thellë në shoqërinë tonë, dhe për të cilën marrëveshje është i domosdoshëm një mekanizëm i qartë zbatimi ndërsa përfundon:
“Presidentja Osmani dhe Përfaqësuesi Special i BE-së, z. Lajçak folën edhe për procesin e stërvonuar të liberalizimit të vizave për qytetarët e Kosovës, dhe nevojën për të ecur përpara urgjentisht, duke qenë se ky proces është i një rëndësie të madhe për kredibilitetin e BE-së në Kosovë.”
Ndryshe, gjatë dy ditëve të qendrimit në Kosovë, Lajçak takoi Kryeministrin e Kosovës, Albin Kurti, kryetarin e LDK-së, Lumir Abdixhiku, kryetarin e AAK-së, Ramush Haradinaj dhe me kryetarin e PDK-së, Memli Krasniqi.
Pas takimit me Presidentene Kosovës, Vjosa Osmani, ai iu drejtua veriut të Mitrovicës për të zhvilluar takim me serbët lokal, për të vazhduar më pas rrugën drejt Serbisë.
