Presidentja e Kosovës thërret seancën konstituive të Parlamentit nesër në ora 12:00
Presidentja Vjosa Osmani ka thirrur për nesër në ora 12:00 seancën konstituive të Parlamentit të Kosovës.
Përmes një njoftimi Zyra e Presidentes thekson se vendimi u mor pas konsultimit me shumicën e partive parlamentare të përfaqësuara në Parlament dhe duke pasur parasysh urgjencën e krijimit të institucioneve.
“Pas konsultimit me shumicën e partive parlamentare të përfaqësuara në Kuvend dhe duke pasur parasysh urgjencën e krijimit të institucioneve, miratimit të buxhetit dhe marrëveshjeve ndërkombëtare, në përputhje me Kushtetutën dhe legjislacionin në fuqi, Presidentja ka vendosur që seancën konstituive të Kuvendit ta ftojë për nesër, më 11 shkurt 2026, në orën 12:00,” thekson Presidenca përmes njoftimit.
Pas këtij vendimi, Kryetari i Parlamentit, Dimal Basha, ka ftuar sot në ora 17:00 një mbledhje të përbashkët liderët e partive që kanë fituar ulëse në Kuvend.
“Sot, më 10 shkurt 2026, mbahet mbledhja e kryetarit të Kuvendit të Republikës së Kosovës, Dimal Basha, me kryetarët e subjekteve politike. Koha: 17:00. Vendi: Salla C 301. Rendi i ditës: Përgatitjet për Seancën konstituive të Legjislaturës X të Kuvendit të Republikës së Kosovës,” thuhet përmes një njoftimi nga Parlamenti i Kosovës.
Ndryshe, një ditë më parë Komisioni Qendror i Zgjedhjeve certifikoi rezultatin e zgjedhjeve të 28 dhjetorit çka i hapi rrugë thirrjes së seancës konstituive.
Në legjislaturën e re, Lëvizja Vetëvendosje do t’i ketë 57 ulëse, Partia Demokratike e Kosovës 22 ulëse, Lidhja Demokratike do të jetë e përfaqësuar nga 15 deputetë, Lista Serbe do t’i ketë 9 deputetë, Aleanca për Ardhmërinë e Kosovës 6 deputetë, KDTP do t’i ketë 2 deputetë, Partia për Liri, Drejtësi dhe Mbijetesë 1 deputet, Koalicioni Vakat 1 deputet, NDS, 1 deputet, IRDK 1 deputet, SDU 1 deputet, PLE 1 deputet, PSA 1 deputet, JGP 1 deputet, LPRK 1 deputet.
