Presidentja e Kosovës: Trinomi i Rugovës – manifest politik e koncept i thellë filozofik
Në akademinë përkujtimore të organizuar nga Presidenca e Kosovës në 20-vjetorin e vdekjes së presidentit historik, Presidentja e Kosovës, Vjosa Osmani, tha se Ibrahim Rugova ka qenë strategu i paqes e i lirisë dhe figura që u respektua në qarqet ndërkombëtare.
“Sot nuk përkujtojmë vetëm një datë, por një epokë që e ndryshoi përgjithmonë rrjedhën e historisë sonë. Askush nuk e mishëroi më thellë e më mirë shprehjen ‘Unë biri yt, Kosovë’ sesa presidenti Ibrahim Rugova.
Ai ishte biri i saj në bindje, përkushtim e sakrificë. I lidhur me tokën, popullin dhe vlerat e saj duke ia kushtuar gjithë jetën, dhe siç thotë zonja Fanë, çdo qelizë të tij ndërtimit dhe mbrojtjes së shtetit të lirë, demokratik e të pavarur të Kosovës,” tha Vjosa Osmani duke vlerësuar se se Rugova ngriti politikën në nivel filozofie dhe arriti që t’ia jep dimensionin human dhe moral politikës.
“Trinomi i presidentit Rugova: liri, pavarësi, demokraci, është manifest politik dhe njëkohësisht koncept i thellë filozofik e human. Për Rugovën liria nuk ishte thjesht mungesë e kufizimeve, por poashtu aftësia e popullit për të vendosur për fatin e orientimin e vet. Pavarësia nuk ishte thjesht një akt juridik, por poashtu realizim i një të drejte historike. Ndërkaq demokracia nuk ishte një instrument pushteti, por mekanizëm dialogu e i realizimit të të drejtave e lirive themelore për të gjithë pa dallim,” tha Presidentja e Kosovës, Vjosa Osmani, duke përfunduar:
“Rugova mbetet shembulli i burrshtetasit që e shndërroi paqen në akt guximi, idenë në shtet dhe fjalën në histori.:
Sejdiu: Rugova vuri themelet e miqësisë me SHBA-të e Evropën
Ndërsa Ish-Presidenti i Kosovës Fatmir Sejdiu tha se në shtyllat kryesore të vizionit të Rugovës për shtetndërtim ishin krijimi i bashkëpunimit ndërkombëtar me personalitete dhe institucione e qeveri, dhe ishte ai cili vuri themelet e miqësisë së Kosovës me SHBA-të e Evropën.
“Ishte një intelektual, kritik, nacional dhe paqësor, që idetë nacionale për liri arriti t’i mbillte jo vetëm te populli i Kosovës por edhe në opinione e institucione ndërkombëtare,” tha Fatmir Sejdiu duke përfunduar:
“Andaj filozofia e tij paqësore u pranua dhe gëzon aq shumë respekt në katër anët e globit.”
Ndryshe, në 20 vjetorin e vdekjes së Ish-Presidentit Ibrahim Rugova, Presidentja e Kosovës, Vjosa Osmani, bashkë me familjen Rugova, lider politik e institucional si dhe ambasador të akredituar në Kosovë kanë bërë homazhe e kanë vendosur kurora lulesh pranë varrin të tij në Velani.
