Presidentja e Kosovës: Veprimet e Policisë ndaj bandave kriminale të Vuçiçit janë legjitime
Pas situatës së krijuar në veri dhe reagimeve të aleatëve SHBA-BE, ka reaguar dhe Presidentja e Kosovës, Vjosa Osmani, duke i vlerësuar si legjitime veprimet e Policisë së Kosovës ndaj strukturave ilegale e bandave kriminale të Vuçiçit.
“Sovraniteti dhe integriteti territorial i Republikës së Kosovës është i pacenueshëm, i patjetërsueshëm dhe i pandashëm, ndaj mbrohet me të gjitha mjetet e përcaktuara me Kushtetutë dhe me ligj. (Neni 2 i Kushtetutës)
Veprimet e Policisë së Kosovës ndaj strukturave ilegale e bandave kriminale të Vuçiqit janë legjitime, në realizim të detyrave të tyre kushtetuese dhe në mbrojtje të të gjithë qytetarëve, pa dallim,” shprehet Presidentja e Kosovës në reagimin e saj duke përfunduar:
“Qëndrueshmëria, jetëgjatësia dhe suksesi i këtyre veprimeve varen njëkohësisht edhe nga koordinimi me aleatët që ishin dhe mbeten garantues të sovranitetit dhe pavarësisë sonë.
Bashkë, jemi gjithnjë më të fortë!”
Ndryshe, sot kryetarët e komunave në veri të Kosovës, Zveçan, Zubin Potok dhe Leposaviç, me asistimin e Policisë së Kosovës u vendosën në zyrat e tyre në objektet komunale me ç’rast bandat serbe u organizuan dhe sulmuan autoritetet policore duke i vënë flakën dhe disa makinave.
