Presidentja e Kosovës: Zëri i Nënave të Srebrenicës, thirrja më e fortë kundër padrejtësisë!

Duke përkujtuar 30-vjetorin e gjenocidit në Srebrenicë, Presidentja e Kosovës, Vjosa Osmani, tha se zëri i Nënave të viktimave mbetet thirrja më e fortë ndaj padrejtësisë.

“30 vjet nga dita kur në Srebrenicë është kryer gjenocid. 8 mijë djem e burra boshnjakë u vranë brutalisht nga regjimi i Milosheviçit.

Pas tri dekadash, zëri i Nënave të Srebrenicës mbetet thirrja më e fortë kundër harresës dhe padrejtësisë,” shprehet Vjosa Osmani në mesazhin përmes rrjetit social Facebook duke e shoqëruar me rrëfimet e nënave të Srebrenicës, të cilave Presidentja e Kosovës u ka ndarë Medalje Presidenciale gjatë Forumit Ndërkombëtar për Gratë, Paqen dhe Sigurinë, ndërsa përfundon: 

“Kosova qëndron përkrah tyre, sepse ne e dimë çfarë do të thotë dhimbja e humbja, por dhe angazhimi i palodhur për drejtësi.

Le të mos harrojmë kurrë, le të mos heshtim kurrë!”

Ndryshe, gjatë luftës në vitet e 90-ta në Bosnje Hercegovinë janë vrarë mbi 100.000 njerëz, janë zhdukur mbi 32.000, dhe ende po kërkohen eshtrat e 7.600 personave, mes tyre ende rreth 1.000 viktima të pagjetura pas gjenocidit në Srebrenicë.

Vitin e kaluar, Qeveria e Kosovës, datën 11 korrik e ka shpallur Ditë përkujtimore për gjenocidin e Srebrenicës.