Presidentja e Kroacisë përgënjeshtron “Jerusalem Post”
Presidentja e Kroacisë, Kolinda Grabar Kitaroviç, mohoi se ka deklaruar se Bosnje Hercegovina është shtet i paqëndrueshëm nën kontrollin e islamit militant.
Gazeta izraelite, Jerusalem Post, ka raportuar se Grabar Kitaroviç, e cila po viziton Izraelin ka thënë se Bosnje Hercegovina “është shumë e paqëndrueshme dhe se në disa aspekte e kanë marrë përsipër njerëz të lidhur me Iranin dhe organizata terroriste”.
Po ashtu, sipas Jerusalem Post, Grabar Kitaroviç ka deklaruar se Bosnja “është nën kontrollin e islamit militant, i cili është dominues në përcaktimin e qëndrimeve”, raporton RFE.
E pyetur nga gazetarët nëse këto deklarata janë të vërteta, Grabar Kitaroviç u përgjigj:
“Absolutisht jo”.
Ajo tha se u ka shprehur autoriteteve izraelite dëshirën e saj për ta parë Bosnjën dhe vendet e tjera të rajonit të anëtarësuara në Bashkimin Evropian.
“Nuk kam dhënë intervista dhe nuk u kam dhënë deklarata gazetarëve përveç dy konferencave për shtyp”, tha presidentja kroate.
E pyetur të komentojë reagimet e ashpra të Bosnjës pas tekstit në Jerusalem Post, Grabar Kitaroviç tha:
“Këto janë komente mbi komentet e një gazetareje. Po e përsëris, nuk e kam thënë atë”.
Ndryshe, anëtari kroat i presidencës së Bosnjes, Zhelko Komshiq, pas shkrimit të Jerusalem Post, tha se Grabar Kitaroviç po vazhdon “aktivitetet propaganduese në dëm të Bosnjes, duke paraqitur gënjeshtra brutale”.
