Presidentja Osmani dekoron futbollistët e Kosovës

Pavarësisht rezultatit, krenaria që futbollistët i kanë dhënë vendit është e pamatshme dhe nuk mund të shprehet as me fjalë, as me dekorata apo nderime, tha Presidentja e Kosovës, Vjosa Osmani, me rastin e dekorimit të Përfaqësuesen e Kosovës me Medaljen Presidenciale të Meritave.

Ky është vetëm fillimi dhe përpara i presin suksese edhe më të mëdha, tha Presidentja Osmani duke theksuar se vlerësimet për ekipin kanë qenë të jashtëzakonshme, si në arenën ndërkombëtare ashtu edhe brenda vendit, duke i cilësuar ata si befasinë më të bukur të këtyre kualifikimeve.

Kapiteni dhe golashënuesi më i mirë i Përfaqësueses së Kosovës, Vedat Muriqi, tha me këtë rast se është krenar që është pjesë e përfaqësueses kosovare, por shprehu zhgënjimin që nuk arriti ta udhëhiqte ekipin në Amerikë, duke thënë se nganjëherë fati zhgënjen.

“Po shpresojmë në të ardhmen të kemi një gjeneratë shumë të mirë, një gjeneratë e artë po vjen…Unë jam shumë krenar me veten që jam pjesë e stafit të Kosovës. Si Kapiten i Kosovës – kisha pas shumë dëshirë me e udhëheq ekipin në Amerikë, por ja, ndonjëherë fati nuk të përcjell. Kështu që, ju falënderoj të gjithëve, në emër të ekipit, edhe shpresoj që tjetrën radhë do të jemi në një kualifikim Evropian ose Botëror,” tha Vedat Muriqi.

Ndryshe, dekorimi i futbollistëve të Kosovës është bërë një ditë pas ndeshjes me Turqinë, ku Kosova pësoi humbje 0:1, në finalen e play offit të Botërorit 2026.

Në ceremoninë e dekorimit nga Presidentja e Kosovë, të pranishëm ishin futbollistët e Përfaqësueses së Kosovës, Kryetari i Federatës së Futbollit, Agim Ademi, dhe trajneri Franco Foda.